काठमाडौं । नेकपा (एकीकृत समाजवादी)का नेता प्रेम आलेले पछिल्लो समय नेपाली सिनेमामा राजनीतिक विषय समेटिन थालेको बताएका छन् । चलचित्र ‘ऐँचो पैँचो’को ट्रेलर सार्वजनिक कार्यक्रममा नेता आलेले पछिल्लो समय नेपालको राजनीतिक अस्थिरतालाई सिनेमाले उठान गरेको बताए । 

‘ऐँचो पैँचो’को ट्रेलरले आफ्नो मन छोएको बताएका उनले नेपालमा यस्ता विषयवस्तुमा अझै धेरै सिनेमा निर्माण हुन आवश्यक रहेको बताए । 

“सिनेमा निर्माण अगाडि सिनेमाको कथामा मलाई पनि समावेश गरेको भएको थुप्रै नयाँ कुरा सिनेमामा आउन सक्थे । तर, पनि सिनेमामा जति आएका छन् यी कुरा मात्रै पनि दर्शकलाई हलसम्म ल्याउन पर्याप्त छन्,” उनले भने ।

भदौ १४ गते आफू परिवारसहित हलमा गएर सिनेमा हेर्ने उनको भनाइ छ । ट्रेलर हेर्दा राजनीतिले देश र समाजमा पारेको प्रभावलाई नजिकबाट देखाउने प्रयास गरेको बुझ्न सकिने उनले बताए । 

निर्देशक कृषा चौलागाईंले निर्देशन गरेको चलचित्रमा स्वस्तिमा खड्का, मुकुन भुसाल, वर्षा राउत, सुशील सिटौला, कोसिस क्षेत्री, रमेश बुढाथोकी, राजाराम पौडेल, बुद्धि तामाङ, रविन्द्र झा, सरिता गिरी लगायत कलाकारको अभिनय छ ।