काठमाडौं । जुवातास खेलिरहेको अवस्थामा काठमाडौं र तनहुँमा गरी २० जना पक्राउ परेका छन् ।

काठमाडौं महानगरपालिका–१७ ढल्कु बस्ने ५१ वर्षीय दिपेन पोडेको सोही ठाउँस्थित इन्द्रायणी वर्कसपमा जुवातास खेलिरहेको अवस्थामा पोडे समेत ९ जनालाई शनिबार दिउँसो प्रहरीले पक्राउ गरेको छ ।

विशेष सूचनाको आधारमा प्रहरी वृत्त लैनचौरबाट खटिएको प्रहरीले उनीहरूलाई नगद ३५ हजार ८० रूपैयाँ र तीन बुक ताससहित पक्राउ गरेको हो ।

त्यस्तै, तनहुँको आबुखैरेनी गाउँपालिका–३, पानीघट्टा बस्ने ४० वर्षीय प्रकाश बगालेको घरमा जुवातास खेलिरहेको अवस्थामा बगाले समेत ११ जनालाई शनिबार दिउँसो प्रहरीले पक्राउ गरेको छ ।

विशेष सूचनाको आधारमा इलाका प्रहरी कार्यालय आबुखैरेनीबाट खटिएको प्रहरीले उनीहरूलाई नगद ६२ हजार ३१० रूपैयाँ र चार बुक ताससहित पक्राउ गरेको जनाइएको छ ।