पोखरा । कुनै बेला सेतो पुतलीको झुसले आँखामा हुने संक्रमण ‘सापु’का बिरामीले पोखराको हिमालय आँखा अस्पताल भरिभराउ हुन्थ्यो । यतिबेला भने आँखा पाक्ने रोग ‘एडिनो भाइरस कन्जन्टिभाइटिस’का बिरामीले अस्पताल भरिएको छ । आँखा पाक्ने रोगका बिरामीको संख्या यही सातामा मात्रै तेब्बरले बढेको छ । 

औसतमा ४/५ सय बिरामी आउने अस्पतालमा पछिल्लो दुई दिनयता मात्रै हजारभन्दा बढी बिरामी आँखा पाक्ने रोगको उपचार गर्न अस्पताल आएका छन् ।

पछिल्लो समय यो रोग यति तीव्र गतिमा फैलिएको छ कि त्यसलाई नियन्त्रण गर्न भनेर पालिकाहरूले विद्यालय नै बन्द गर्न थालेका छन् ।

नवलपुरको कावासोती नगरपालिका र हुप्सेकोट गाउँपालिकाले सोमबार नै चार दिनका लागि भनेर विद्यालय बन्द गरेका छन् । तनहुँको शुक्लागण्डकी नगरपालिकास्थित खैरेनी माध्यमिक विद्यालय र पञ्चमुनिदेव माध्यमिक विद्यालय बन्द गरिएका छन् । खैरेनीटार माध्यमिक विद्यालय साउन २४ गतेसम्म बन्द भएको छ । पोखरामै पनि रामबजारमा रहेको एक विद्यालय बन्द गरिएको छ । 

आँखा पाक्ने रोग फैलिने दर तीव्र गतिमा बढेका कारण महानगरपालिका भित्रका विद्यालय बन्द गर्ने वा सञ्चालन गर्ने भन्ने विषयमा महानगरपालिकाले मंगलबार निर्णय लिने जनाएको छ ।

सोमबार नै पत्रकार सम्मेलन गरेर हिमालय आँखा अस्पतालले आँखा पाक्ने रोगका बिरामीको संख्या बढेको जानकारी दिएको छ ।

गण्डकी प्रदेशकै एकमात्र आँखा रोगको विशेषज्ञ अस्पताल हिमालय आँखा अस्पतालमा गएको मंगलबारदेखि आइतबारसम्म मात्रै १ हजार ५७३ जना बिरामी आँखा पाक्ने रोग लिएर उपचार गराउन आएको अस्पतालकी मेडिकल निर्देशक डा. इलिया श्रेष्ठले जानकारी दिइन् ।

यो रोग सबै उमेर समूहलाई लाग्ने भएतापनि बालबालिकामा संक्रमणको दर उच्च छ । डा. श्रेष्ठका अनुसार ९१८ जना बालबालिकामा यो रोग देखिएको छ ।

आइतबार मात्रै अस्पताल आएकामध्ये ६२९ बिरामी आँखा पाक्ने ‘एडिनो भाइरस कन्जन्टिभाइटिस’का संक्रमित थिए । तीमध्ये ३६० जना बालबालिका हुन् ।

सोमबार त बिहानैदेखि अस्पतालमा बिरामीको झनै भिड बढेको छ । आँखा पाक्ने रोगले ग्रसित भएपछि जिल्ला जिल्लाबाट आएका बिरामीले भिड बढेको छ ।

यो संक्रमणका मुख्य लक्षणहरूमा आँखा पोल्ने, बिझाउने, आँसु धेरै आउने, आँखा रातो देखिने, सुन्निनेजस्ता समस्या देखिन्छन् ।

डा. श्रेष्ठ भन्छिन्, “यो हावाबाट सर्दैन । हाम्रो आँखाको तरल पदार्थबाट भाइरस ट्रान्समिसन हुन्छ । हातमा संक्रमितको आँसु पर्‍यो भने त्यहाँबाट सर्छ ।”

संक्रमितले प्रयोग गरेको रुमाल, साबुन, चस्मा, औषधिलगायत सामग्री अरूले प्रयोग गर्दा संक्रमण सजिलै सर्ने उनले बताइन् । 

डा. श्रेष्ठले आँखा नमाड्न, पानी नछ्याप्न, जथाभाबी औषधिको प्रयोग नगर्न, घरबाहिर जाँदा कालो चस्मा प्रयोग गर्न र लक्षण देखिएपछि अस्पताल जान सुझाव दिइन् । "आँखा पाक्यो भनेर कति जनाले आँखा खोलेर पानी छ्याप्छन्, त्यो चाहिँ गर्नुहुँदैन," उनले भनिन् ।

अस्पतालका प्रा. डा. इन्द्रमान महर्जनका अनुसार अहिले अस्पतालमा आउने बिरामीको संख्या तेब्बरले बढेको छ । उनका अनुसार अहिले दैनिक १२/१३ सय जना बिरामी आउँछन् । तीमध्ये अधिकांशमा बढीमा आँखा पाक्ने रोग देखिएको छ ।