![धेरै कुरा घोषणा गर्छौँ, कार्यान्वयन गर्दैनौँ : अर्थमन्त्री](https://12khari.top/uploads/posts/Prakash-Mahat1691066117.jpg)
काठमाडौं । अर्थमन्त्री डा. प्रकाशशरण महतले मौद्रिक नीतिले व्यवसायीका माग सम्बोधन नगरेको भन्दै चालु पुँजी कर्जासम्बन्धी मार्गदर्शनले सम्बोधन गर्नेमा आशावादी रहेको बताएका छन् ।
शनिबार काठमाडौंमा नेपाल अडिटर्स एसोसिएसन (अडान)को १८औँ वार्षिकोत्सवका अवसरमा आयोजित कार्यक्रममा उनले व्यवसायीका माग चालु पुँजीसम्बन्धी मार्ग निदेशनले सम्बोधन गर्नेमा आफू आशावादी रहेको उल्लेख गरे ।
“मौद्रिक नीतिले तपाईंहरूका सबै माग सम्बोधन गरेन, केही सम्बोधन त गरेको छ । तर, अब छिट्टै आउने वर्किङ क्यापिटलसम्बन्धी मार्गदर्शनले सम्बोधन गर्ला । छिटै ल्याउँदै छ भन्ने सुनेको छु,” उनले भने, “फिस्कल पोलेसीले केही दिएन भन्ने नसोच्नु होला । हामीले पुँजीगत खर्च बढाउने गरी काम गरिरहेका छौँ ।”
राज्य संयन्त्रमा समस्या भएकाले अहिलेको स्थिति निम्तिएको उनले बताए । “हामी धेरै कुरा घोषणा गर्छौँ, तर कार्यान्वयन गर्दैनौँ । यसले समस्या निम्त्याएको छ । फिउचरको निर्णय अहिलै नै गर्दा समस्या निम्त्यायो,” उनले भने, “स्रोत सुनिश्चितता नहुँदा निर्माण क्षेत्रमा समस्या आयो । पहिले बिग्रिएको कुरा सुधार गर्न समय लाग्छ ।”
केही ख्याल नगरी बाह्य सहयोग लिने प्रवृत्तिले बिगारेको पनि उनले बताए । अर्को वर्ष ऋणको दायित्व अझै बढ्ने उनको भनाइ छ ।
ऋण लिएर उत्पादनशील क्षेत्रमा लगानी नगर्दा समस्या उत्पन्न भएको मन्त्री महतले बताए ।