काठमाडौं । प्राविधिक शिक्षा तथा व्यावसायिक तालिम परिषद् (सीटीईभीटी)ले चिकित्सा शिक्षाअन्तर्गतका विषयमा भर्ना प्रक्रिया चिकित्सा शिक्षा ऐनअनुसार नै गर्ने भएको छ । सीटीईभीटीका उपाध्यक्ष खगेन्द्रप्रसाद अधिकारीले भर्ना प्रक्रियामा आयोगको सुझावअनुसार नै अघि बढ्ने तयारी भएको बताए । 

“भर्नाको सम्बन्धमा चिकित्सा शिक्षा आयोगले उठाएको विषयलाई नै मनन गरी उहाँहरूसँगकै समन्वयमा अघि बढ्ने तयारी भएको छ । यससम्बन्धी सम्पूर्ण प्रक्रिया मन्त्रालयको रोहबरमा हुने छ,” अधिकारीले बाह्रखरीसित भने ।

योसँगै सरकारका दुई निकायबीचको कार्यक्षेत्र र अधिकारको विवाद सुल्झिने देखिएको छ । 

विवाद के थियो ? 

सीटीईभीटीले आफू मातहतका कलेजहरूमा आगामी शैक्षिक सत्रका लागि भर्ना प्रक्रिया अघि बढाएको थियो । तर, चिकित्सा शिक्षा आयोगले मापदण्ड नपुगेका कलेजहरूको भर्ना प्रक्रिया तत्काल अघि नबढाउन सीटीईभीटीलाई निर्देशन दिएको थियो । 

सीटीईभीटीले भने आयोगको परिपत्रानुसार प्रमाणपत्र तहका कार्यक्रमको भर्ना नरोक्ने जनाएको थियो ।

आयोगको पत्रको भ्रममा नपरी सीटीईभीटीले निर्धारण शैक्षिक सत्र २०८०/०८१ को भर्ना प्रक्रियामा सहभागी हुन अभिभावक र विद्यार्थीलाई आह्वानसमेत गरिसकेको थियो । तर, भर्ना प्रक्रिया चिकित्सा शिक्षा ऐन मिचेर अघि नबढाउन आयोगले सुझाएको थियो । 

“सीटीईभीटीका उच्च अधिकारीहरूको तहबाट यस्तो निर्णय भएको पक्कै होइन । ऐनविपरीत भर्ना प्रक्रिया अघि बढाउने आह्वान बीचका कुनै स्वार्थी समूहबाट भएको हुनुपर्छ । त्यसैले यो सच्चिनुपर्छ । ऐन र कानुनभन्दा माथि कोही हुँदैन । सीटीईभीटीले पनि यो निर्णय सच्याउँछ भन्नेमा म विश्वस्त छु,” आयोगका उपाध्यक्ष डा. श्रीकृष्ण गिरीले बाह्रखरीसित भने । 

शिक्षा विज्ञान तथा प्रविधिमन्त्री अशोककुमार राईले दुई निकायका प्रतिनिधिहरूलाई राखेर केहीदिन यता निरन्तर छलफल गराइरहेका थिए । पछिल्लोपटक बिहीबार दुई निकायबीच छलफल भएको थियो । 

ऐनले के भन्छ ?

सीटीईभीटीले यसअघि आफ्नो मातहतका कलेजको भर्ना प्रक्रियाको सम्पूर्ण अधिकार परिषद् परीक्षा नियन्त्रण कार्यालयलाई नै हुने जनाउँदै भर्ना सूचना निकालेको थियो । आफ्नो मातहतका कलेजहरूमा प्रमाणपत्र तहसम्मका सम्पूर्ण कार्यक्रममा भर्ना तथा पढाइ सञ्चालनको अधिकार प्राविधिक शिक्षा तथा व्यावसायिक तालिम परिषद् ऐन, २०४५ अनुरूप नै हुने सीटीईभीटीले दाबी गरेको थियो । 

यता राष्ट्रिय चिकित्सा शिक्षा ऐन, २०७५ मा आयोगको काम, कर्तव्य र अधिकार तोकिएको छ । जसमा ‘आयोगले संघ र प्रदेश तहका चिकित्सा शिक्षाको सबै तह तथा विधाको मापदण्ड र स्तरसम्बन्धी नीति तथा मापदण्ड निर्धारण गर्ने’ उल्लेख छ । त्यस्तै ‘परिषद् (सीटीईभीटी) अन्तर्गत प्रमाण तहका स्वास्थ्य शिक्षासम्बन्धी कार्यक्रमहरूको प्रवेश परीक्षा सम्बन्धी व्यवस्था आयोगको समन्वयमा परिषद्ले गर्ने भन्ने उल्लेख छ ।  

सीटीईभीटीले आफ्नो मातहतमा २४२ वटा शिक्षण संस्थाबाट चिकित्सा शिक्षाका विभिन्न कार्यक्रमहरू सञ्चालन गर्दै आएको छ ।