काठमाडौं । बुधबार दिनभर उतारचढाव देखिएको सेयर बजारमा अन्तिम १५ मिनेटमा १५ अंकको वृद्धि भएको छ । २ बजेर ४५ मिनेट जाँदादेखि ३ बजेको बिचमा परिसूचक १५ अंक बढेको हो ।

आज नेप्से परिसूचक ९.२५ अंक वृद्धि भएर २०८६.८४ विन्दुमा रोकिएको छ ।

नेपाल स्टक एक्सचेन्ज (नेप्से)का अनुसार मंगलबार नेप्से साढे २८ अंक घटेर बन्द भएको थियो । चालु आर्थिक वर्ष २०८०/८१ को मौद्रिक नीति सार्वजनिक भएपछि लगातार पाँच करोबार दिन नेप्से घटेको थियो । गत सोमबार भने नेप्से ५.८४ अंक बढेको थियो ।

आज म्युचुअल फन्ड, ऋणपत्र र सेयर गरी २६९ धितोपत्रको ९३ लाख ६१ हजार ७८६ कित्ता खरिद–बिक्री भएको छ । स्ट्याण्डर्ड चाटर्ड बैंकको सेयर मूल्य २२ रुपैयाँ वृद्धि भएको छ । 

शिवम् सिमेन्टको सेयर कारोबारले सर्वाधिक हिस्सा ओगटेको छ । यो कम्पनीको ११ करोड १९ लाख रुपैयाँको सेयर कारोबार भएको छ । यो कम्पनीको सेयर मूल्य प्रतिकित्ता ५९६ रुपैयाँ कायम भएको छ ।

कारोबारमा आएका १३ समूहमध्ये माइक्रोफाइनान्स, हाइड्रोपावर र व्यापार समूहको परिसूचक घटेको छ । सर्वाधिक परिसूचक वृद्धि फाइनान्स समूहको  भएको छ । यो समूहको परिसूचक १.६९ प्रतिशतले वृद्धि भएको छ ।