काठमाडौं । संघीय संसद्को संसदीय सुनुवाइ समितिमा प्रस्तावित राजदूतविरुद्ध परेका उजुरीमाथि मंगलबार छलफल गरिएको छ । सिंहदरबारस्थित समितिको कार्यकक्षमा बसेको बैठकमा प्रस्तावित राजदूतविरुद्ध प्राप्त उजुरीबारे जानकारी गराइयो ।

नाम र मन्त्रालय नखुलाई कर्मचारीले इमेलमार्फत पठाएको उजुरीमा प्रस्तावित एक राजदूतले अंग्रेजी लेख्न नसक्नेलगायत आरोप लगाइएको छ ।

युनाइटेड अरब इमिरेन्ट्स (यूएई)का लागि प्रस्तावित राजदूत तेजबहादुर क्षेत्रीका विषयमा उजुरीकर्ताले यस्तो आरोप लगाएका हुन् । मन्त्रालयमा क्षेत्री ‘टीका लगाएर छिरेको र त्यसपछि कहीँ कतै पास नभएको’ उजुरीमा उल्लेख छ ।

“...टीका लगाएर मन्त्रालयमा छिरेका हुन् र त्यसपछि आजसम्म कहिले पनि पास भएका छैनन्,” उजुरीकर्ताले लेखेका छन्, “यिनले एक प्याराग्राफ पनि अंग्रेजी लेख्न सक्दैनन्, यिनलाई टेस्ट लिन सकिन्छ । यस्ता मान्छेले देशकै बेइज्जत गर्ने हुन् ।”

गएको असार २८ गते बसेको मन्त्रिपरिषद्को बैठकबाट राजदूतका लागि उनीसहितको नाम सिफारिस गरिएको थियो । अहिले राजदूतका लागि सिफारिसमा परेका सबै परराष्ट्र मन्त्रालयका सहसचिव (करिअर डिप्लोम्याट) रहेका छन् ।

अमेरिकाको न्युयोर्कस्थित राष्ट्रसंघका लागि नेपाली स्थायी नियोगमा लोकबहादुर थापा, यूएईका लागि तेजबहादुर क्षेत्री, कुवेतका लागि घनश्याम लम्साल, थाइल्यान्डका लागि धनबहादुर ओली, फ्रान्सका लागि सुधीर भट्टराई र जेनेभास्थित स्थायी नियोगका लागि रामप्रसाद सुवेदीको नाम सिफारिस गरिएको छ ।

अर्को बैठकमा यी सबै प्रस्तावित राजदूतहरूको संसदीय सुनुवाइ कार्य सकाउने समितिले निर्णय गरेको छ ।