काठमाडौं । नेपाली कांग्रेसका प्रमुख सचेतक श्यामकुमार घिमिरेले सरकारले प्रस्तुत गरेको आगामी आर्थिक वर्षको नीति तथा कार्यक्रम आर्थिक अभावका कारण कार्यान्वयन गर्न चुनौतीपूर्ण रहेको बताएका छन् ।

संसद् भवन परिसर नयाँ बानेश्वरमा सोमबार सञ्चारकर्मीहरूसँग कुराकानी गर्दै प्रमुख सचेतक घिमिरेले कतिपय नीति तथा कार्यक्रमहरू लागु गर्नसक्ने खालका नरहेको बताए । “आर्थिक समस्याका कारण सरकारले ल्याएको नीति तथा कार्यक्रम पूर्ण रूपमा लागु हुन्छ भन्नेकुरामा शंका छ,” उनले भने ।

प्रमुख सचेतक घिमिरेले आर्थिक सुधार सुझाव आयोगले दिएको सुझावको आधारमा नीति तथा कार्यक्रमहरू समग्र रूपमा राम्रो आए पनि कार्यान्वयन गर्न चुनौतीपूर्ण रहेको बताए ।

उनले नीति तथा कार्यक्रम कार्यान्वयनको चुनौतीलाई कसरी सामना गर्ने भन्नेकुरा सरकारका लागि गम्भीर प्रश्न रहेको बताए ।