जनकपुरधाम । मधेस प्रदेश सरकार पाँचौँपटक विस्तार भएको छ । सोमबार दुईजना मन्त्रीको पद तथा गोपनीयताको शपथ लिएका छन् ।

कांग्रेसबाट गृह, सञ्चार तथा कानुनमन्त्रीमा मोहमद समिमले शपथ लिएका छन् । जनमतबाट श्रम तथा यातायात मन्त्रीमा चन्दन सिंहले शपथ लिए ।

समिम सप्तरी निर्वाचन क्षेत्र नम्बर ३ को ‘क’बाट निर्वाचित सांसद हुन् । सिंह समानुपातिक सांसद हुन् ।

मन्त्रिपरिषद् विस्तार भएपछि सरकारले पूर्णता पाएको छ । तर, जसपाबाट मन्त्री बनेकी सुरिता साहले अझै जिमेवारी पाएकी छैनन् । मुख्यमन्त्री सरोज कुमार यादवले एक मन्त्रालय फुटाएर सुरितालाई जिमेवारी दिने तयारी गरेका छन् ।

जनमत पार्टीबाट मन्त्री बनेका वसन्त कुशवाहा र राज्यमन्त्री सञ्जय यादवले सोमबार पार्टीको निर्देशन अनुसार राजीनामा दिएका थिए । जनमतबाट शिक्षा तथा समाज कल्याणमन्त्रीमा महेशप्रसाद यादव यथावत छन् ।

गत जेठ ११ गते कुशवहा र यादवको जिमेवारी पनि खोसिएको थियो । कुशवाहाले सम्हालेको भूमि व्यवस्था कृषि तथा सहाकारी मन्त्रालय खोसेर एकीकृत समाजवादीका गोविन्द न्यौपानेलाई नियुक्त गरिएको थियो । त्यसपछि कुशवाहा र उक्त मन्त्रालयका राज्यमन्त्री यादव बिनाविभागीय मन्त्री थिए ।