काठमाडौं । नेपाल राष्ट्र बैंकले बैंक तथा वित्तीय संस्थालाई औसत आधारदरभन्दा कम ब्याजदरमा पनि ऋण लगानी गर्न पाउने व्यवस्था गरेको छ । 

नेपाल राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्थालाई जारी गरिएको एकीकृत निर्देशन, २०७९ मा संशोधन गर्दै यस्तो व्यवस्था गरेको हो ।

संघीय, प्रदेश र स्थानीय तहले आफ्नो कार्यक्रम अन्तर्गतको वा कुनै दातृ निकायबाट प्राप्त सहुलियत दरको सहायता वा अनुदान रकमलाई बैंक तथा वित्तीय संस्थामार्फत तोकिएको क्षेत्र एवं वर्गमा ऋण परिचालन हुनेगरी सञ्चालन गरेको छ । कार्यक्रम अन्तर्गतको ऋण औसत आधारदरभन्दा कम ब्याजदरमा बैंक तथा वित्तीय संस्थाले प्रवाह गर्न सक्छन् ।

तर, अन्य कुनै पनि कर्जाको हकमा पछिल्लो तीन महिनाको औसत आधारदरभन्दा कम ब्याजदरमा ऋण प्रवाह गर्न पाइने छैन ।