काठमाडौं । नेपाली कांग्रेसकी सहमहामन्त्री महालक्ष्मी उपाध्याय डिनाले 'पार्टी खत्तम भयो' भनेर मनोबल गिराउने काम भइरहेको बताएकी छन् । जारी केन्द्रीय समिति बैठकमा आइतबार उनले पार्टीलाई गठबन्धनबिना शक्तिशाली बनाउनेबारे सोच्नुपर्ने बताइन् ।
“केही साथीहरूले पार्टी डुब्यो, खत्तम भयो भन्ने कुरा उकास्न खोजिरहनुभएको छ । मलाई आश्चर्य लाग्छ, स्थानीय तहमा पहिलो पार्टीको रूपमा स्थापित भएको छ,” उनले भनिन्, “प्रदेशमा र केन्द्रमा पनि पहिलो पार्टी स्थापित भएको छ । यस्तो बेलामा पार्टीको साथीलाई मनोबल गिराउने प्रयास भएको छ, यो निन्दनीय छ ।”
उनले पार्टीभित्रैबाट बालकृष्ण खाँणमाथि लागेको आरोप प्रमाणित गर्न सहयोग पुर्याइरहेको बताइन् ।
“यो न्यायपालिकाले गर्ने हो, स्वतन्त्र न्यायलय कांग्रेसको आधार हो । कांग्रेसका केही साथीले दबाब दिएर न्यायालयलाई प्रभावित गर्ने काम गर्न खोजिरहनुभएको छ,” उनले भनिन् ।
उनले पार्टीमा टेप रेकर्ड भन्दै आधारहीन कुरालाई जबरजस्ती फसाउने काममा किन लागेको ? भन्दै प्रश्न सोधिन् ।
उनले जिल्लामा कसैलाई आरोप लाग्यो भने पक्षमा कि विपक्षमा उभिने भन्दै प्रश्न गरिन् ।
“हाम्रो साथी पर्दा हामी खुसी भएका हौँ कि दुखी भएका हौँ । जिल्लामा कसैलाई आरोप लाग्यो भने त्यसको पक्षमा उभिने कि नउभिने ?,” उनले सोधिन् ।
उनले राष्ट्रपतिहरूको उपचारको खर्चको मापदण्डबारे पनि प्रश्न गरिन् । उनले पहिलको राष्ट्रपतिले गरेको खर्चबारे जानकारी गराउनुपर्ने बताइन् ।
“औषधि उपचारको खर्चको मापदण्ड के हो ? माननीयले पाउने ? विगतकाले कति लिए ? अहिलेको राष्ट्रपतिले लिएको विषयमा किन विरोध भइरहेको छ ?,” उनको प्रश्न छ ।
