काठमाडौं । नेपाली कांग्रेसका नेता विजयकुमार गच्छदारले आउँदो असोजमा पार्टीको नीति अधिवेशन गर्नुपर्ने बताएका छन् । आइतबार पार्टी केन्द्रीय कार्यसमितिको बैठकमा उनले समयमै नीति अधिवेशन गर्नुपर्नेमा जोड दिए ।
नीति अधिवेशनमा पार्टीको आउँदो दिशाका बारेमा माथिबाट नै बहस हुनुपर्ने उनले बताए ।
“देशको राजनीति बिग्रिएको छ । अझै बिग्रिन्छ देशको राजनीति । बिग्रिरहेको राजनीतिक परिवेशमा नेपाली कांग्रेसले कसरी अगाडि बढ्दाखेरि राम्रो हुन्छ भनेर यो चानचुने विषय होइन । एक नम्बरको एजेन्डामा देशको समसामयिक राजनीतिक विषयमा छुट्टै बैठक राखियोस्,” उनले भने, “समयमै नीति अधिवेशन गर्नुस् । सक्नुहुन्छ भने असोजमा गर्नुस् । सक्नु हुन्न भने कार्तिकमा चाडपर्व छ, मंसिरमा गर्नुस् । नीति अधिवेशनमा तपाईंले सभापतिजी, एजेन्डा प्रस्तुत गरिसकेपछि प्रस्तावमा माथिबाट नै बहस गर्ने अनुमति दिनुस् ।”
देशको समसामयिक राजनीतिक अवस्थाका विषयमा छलफल गर्न पार्टीको छुट्टै बैठक गर्नुपर्ने उनले माग गरे । देशको राजनीति बिग्रिरहेको भन्दै उनले यस्तो अवस्थामा कांग्रेस कसरी अगाडि बढ्ने भन्नेमा छलफल हुनुपर्ने बताए ।
