काठमाडौं । विश्वराज अधिकारी तथा ममता मृदुलद्वारा सम्पादित पुस्तक ‘अशेष मल्ल : अनुभूतिको विविध प्रवाहमा’ एक कार्यक्रमकाबीच सार्वजनिक भएको छ । पुस्तक कवि डा. विष्णुविभु घिमिरेलगायतले लोकार्पण गरे ।

नारी स्रष्टा समाज, विराटनगरले बिहीबार काठमाडौंमा आयोजना गरेको कार्यक्रममा डा. घिमिरेले मल्ल र आफ्नो सम्बन्ध २०३२ सालमा विराटनगरमा पढ्दादेखि नै भएको बताए । उनले भने, “नाटक लेख्ने र नेपालभरि नाटक देखाउने सपना उसको (मल्लको) त्यही बेलादेखिको हो । त्यसैले ऊ निरन्तर नाटकमा लागिरह्यो । नेपाली नाट्य क्षेत्रको एउटा पहाड हो अशेष ।” 

ममता र विश्वराजले अशेष मल्लको जीवनकालमै ऊमाथि लेखेको पुस्तक समर्पण गरेर सराहनीय काम गरेको बताए ।
कार्यक्रममा आउँदासम्म आफ्नो बारेमा लेखिएको पुस्तक सार्वजनिक हुँदै छ भन्ने अशेष मल्ललाई जानकारी थिएन । मञ्चमा मोडिएको ब्यानर सिधा बनाएपछि त्यो हेरर मल्ल र उनकी पत्नी प्रा.डा. सावित्री मल्ल कक्षपति आश्चर्यचकित भएका थिए ।

सम्बोधनका क्रममा नाट्यस्रष्टा अशेष मल्लले भावुक हुँदै नाटकप्रतिको आफ्नो पागलपनले नै आफूलाई यहाँसम्म ल्याइपुर्याएको बताए । उनले भने, “कामप्रति पागलपन भएन भने कुनै काम गर्न सकिँदैन । त्यसैले सर्वनाम जन्मायो । त्यसैले सर्वनाम नाट्य घरको जग हाल्यो ।”

सामान्यतया एक दुई मिनेटमा आफ्नो सम्बोधन पूरा गर्ने मल्लले लामो बोल्दै सर्वनाम स्थापनाको आफ्नो अनुभूति बताएका थिए । 

कार्यक्रममा लेखक खेमराज पोखरेलले कृतिमाथि समीक्षात्मक टिप्पणी गर्दै स्रष्टाको जीवनकालमै कृति आउनु स्तुत्य रहेको बताए ।

सम्पादकद्वय ममता र विश्वराजले बितेको एक वर्षदेखि आफूहरू यस काममा खटिएको बताए । पुस्तकभित्र सम्पादकहरू, डा. घिमिरेसहित १८ जनाले अशेष मल्लको व्यक्तित्व र कृतित्वबारे लेखेका छन् । उक्त अवसरमा प्रा.डा. कक्षपति, श्रीओम श्रेष्ठ रोदन, लक्ष्मीकृष्ण श्रेष्ठ, रञ्जना निरौलाले बोलेका थिए ।