काठमाडौं । अमेरिकी राष्ट्रपति डोनाल्ड ट्रम्प इरानमाथि आक्रमण गर्ने योजनामा सहमत भएका छन् । तर, उनले अझै इरानमा हमला गर्ने बारेमा अन्तिम निर्णय नगरेको सीबीएस न्युजलाई उदृत गर्दै बीबीसीले जनाएको छ ।

एक अमेरिकी वरिष्ठ गुप्तचर स्रोतले सीबीएसलाई बताए अनुसार, इरानले आफ्नो परमाणु कार्यक्रम छोड्न सहमत भएमा आक्रमण सुरु गर्न नहुने भन्दै ट्रम्पले रोक लगाएका हुन् । यो खबर सबैभन्दा पहिले वालस्ट्रिट जर्नलले प्रकाशित गरेको थियो ।

बुधबार, ट्रम्पले इरानमा अमेरिकी संलग्नताको बारेमा सोधिएको प्रश्नको जवाफमा भने, “म यो गर्न वा नगर्न पनि सक्छु ।”

सीबीएसले यसअघि ट्रम्पले इरानको फोर्डो (एक भूमिगत युरेनियम विकास संरचना)माथि अमेरिकी हमला गर्ने विचार गरिरहेको उल्लेख गरेको थियो ।

द्वन्द्व रोक्ने अन्तिम प्रयासका लागि युरोपेली र इरानी मन्त्रीहरूको बैठक 
समाचार संस्था रोयटर्सका अनुसार जर्मनी, फ्रान्स र बेलायतका विदेश मन्त्रीहरूले शुक्रबार जेनेभामा इरानी विदेश मन्त्रीसँग भेट्ने योजना बनाएका छन् । यो बैठकको एजेन्डा इरानको परमाणु कार्यक्रम र अझै जरुरी, इजरायलसँग बढ्दो तनाव कम गर्नु रहेको बताइएको छ ।

युरोपेली अधिकारीहरूले इरानले आफ्नो परमाणु गतिविधिमा कुनै ढिलाइ वा बन्द गराउने कदमलाई स्वागत गर्नसक्ने तर नेटो सहयोगीहरू र अमेरिकी साझेदारहरूको छेउछाउमा पूर्णरुपमा युद्ध हुँदा धेरै युरोपेली नेताहरूलाई तनाव दिने बीबीसीले जनाएको छ ।

संयुक्त राष्ट्रसंघ सुरक्षा परिषद्ले आपतकालीन बैठक बोलाउने
संयुक्त राष्ट्र सुरक्षा परिषद्ले शुक्रबार आपतकालीन बैठक बोलाउने भएको छ । यो इरान, रूस, चीन, पाकिस्तान र अल्जेरियाको अनुरोधमा हुने बताइएको छ । यो बैठकमा चलिरहेको द्वन्द्वको बारेमा छलफल हुने सीबीएस न्यूजले जनाएको छ ।

संयुक्त राष्ट्रसंघका इजरायली राजदूत ड्यानी ड्याननले उनीहरू यस बैठकमा सहभागी हुने बताए । राजदूतले भने, “इजरायले आफ्नो रक्षा मात्र नगरेर सम्पूर्ण स्वतन्त्र विश्वसमक्ष रहेको ठूलो खतरा पनि नष्ट गरेको छ ।” बीबीसी