काठमाडौं । नेपाली कांग्रेसको केन्द्रीय समिति बैठकमा भ्रष्टाचारमा दोषी देखिएका नेतालाई कारबाही गर्नुपर्ने आवाज उठेको छ । बिहीबार बैठकमा बोल्दै केन्द्रीय सदस्य मधु आचार्यले बैठकले नीतिगत निर्णय गरेर अख्तियार दुरुपयोग गरेकाहरूको सम्बन्धमा दोषी देखिए स्वतः निलम्बन हुने व्यवस्था गर्न माग गरे । 

“एउटा नीतिगत निर्णय नै गरौँ कि अख्तियार अख्तियार दुरुपयोग गरेको वा भ्रष्टाचारको कुनै पनि घटनामा पार्टीको नेता वा सदस्य दोषी देखिएमा तत्काल निलम्बन भएको स्वतः मानिने छ भनौँ,” उनले भने । 

उनले बहुचर्चित भ्रष्टाचार काण्डको छानबिन गर्न पार्टीले सरकारलाई दबाब दिनुपर्ने बताए । यसका लागि सडकमा उत्रिएर भए पनि वातावरण सिर्जना गर्नुपर्ने माग उनको छ । 

“बहुचर्चित भ्रष्टाचार काण्डको छानबिन गर्न सरकारलाई कांग्रेसले दाबाब दिनुपर्छ । आवश्यक परे सडकमा उत्रिन हामी तयार हुनुपर्छ । छानबिनको क्रममा दोषी देखिए, यो त्यो मन्त्री, राज्यमन्त्री, पूर्वमन्त्री, प्रधानमन्त्री भनेर हुँदैन कारबाहीको दायराभित्र ल्याउन  दबाब दिनुपर्छ । व्यक्ति हैन एजेन्डा हेर्छ भन्ने कुरा स्थापित गर्न जरुरी छ,” उनले भने ।