काठमाडौं । नेपाली कांग्रेसको जारी केन्द्रीय समिति बैठकमा पार्टी नेता तथा पूर्वगृहमन्त्री बालकृष्ण खाँणको बचाउमा केन्द्रीय सदस्यहरू उत्रिएका छन् । सानेपामा जारी बैठकमा बुधबार केन्द्रीय सदस्य राधा घलेले आरोप लाग्दैमा कोही पनि दोषी नहुने बताइन् ।
बैठकमा बोल्दै केन्द्रीय सदस्य घलेले आफ्नो साथी तथा पार्टीको नेता पक्राउ पर्दा पार्टी नेतृत्व संवेदनशिल भएर बचाउमा उत्रनुपर्नेमा उल्टो गृहमन्त्रीलाई भेटेर बधाई दिनु कति उपयुक्त हो भन्दै प्रश्न गरिन् ।
“आज एउटा नेतालाई, साथीलाई विना कारण समातेर लग्दै गर्दा आफ्नै पार्टीको साथीहरू सवेदनशिल नहुनु, गृहमन्त्रीलाई बधाई दिन जानु कति उपयुक्त हुन्छ ?,” उनको प्रश्न थियो ।
केन्द्रीय सदस्य घलेले आफ्नो नेताको बचाउमा उत्रेर साथ दिनुपर्नेमा पार्टीका नेताहरू विरोधमा उत्रिएको भन्दै गुनासो गरिन् । अरुलाई खाएको बाघले आफूलाई पनि खान्छ भन्दै उनले दोषी करार नहुन्जेल साथ दिनुपर्ने धारणा राखिन् ।
“एउटा साथीलाई दुख पर्दा काँध हाल्न सक्दैनौं । आरोप लाग्दैमा कोही पनि दोषी हुँदैन,” उनले भनिन्, “जबसम्म दोषी सावित हुँदैन कमसेकम एउटालाई पर्दा हामीभित्रै साथीहरूले साथ दिदैनौं भने एउटालाई खाने बाघलाई अरुलाई पनि खान्छ ।”
