काठमाडौं । अख्तियार दुरुपयोग अनुसन्धान आयोगले एक वर्षमा १८ हजार २४५ वटा उजुरी फर्छ्योट गरेको छ । अख्तियारले गत आर्थिक वर्ष २०७९/८० मा उक्त उजुरीहरु फर्छ्योट गरेको हो ।

अख्तियारका अनुसार आर्थिक वर्ष २०७८/७९ बाट जिम्मेवारी सरेर आएका सात हजार १६२ समेत गरी कुल २७ हजार ५३० उजुरीहरु परेका थिए । परेका कुल उजुरीमध्ये ६६.२७ प्रतिशत फर्छ्योट गरिएको अख्तियारले जनाएको छ ।

अघिल्लो आर्थिक वर्ष २०७८/७९ मा अख्तियारमा कुल २४ हजार ३३१ वटा उजुरी परेका थिए । ती उजुरीमध्ये १७ हजार १६९ उजुरी फर्छ्योट गरिएको थियो ।

अघिल्लो आर्थिक वर्ष परेकामध्ये ७०.५६ प्रतिशत उजुरी फर्छ्योट भएका थिए । गत आर्थिक वर्ष एक हजार ७३ वटा उजुरीलाई विस्तृत अनुसन्धानको लागि पठाइएको अख्तियारले जनाएको छ । अघिल्लो आर्थिक वर्ष यस्तो उजुरीको संख्या ८२३ रहेको थियो ।