काठमाडौं । पोर्चुगलका कप्तान क्रिस्टियानो रोनाल्डोले आफू कहिल्यै अमेरिकी मेजर लिग सकर (एमएलएस)मा नजाने बताएका छन् ।

सोमबार पोर्चुगलमा साउदी अरेबियन क्लब अल नासर र सेल्टा भिगोबीचको खेलपछि रोनाल्डोलाई हालै मात्र एमएलएस क्लब इन्टर मियामी भित्रिएका मेसीका बारेमा सोधिएको थियो । जवाफमा रोनाल्डोले आफू मेसीले पछ्याएको बाटोमा कहिल्यै नजाने प्रतिक्रिया दिए । रोनाल्डोले युरोप फर्कने आफ्नो कुनै योजना नरहेको पनि स्पष्ट पारे ।

“साउदी लिग एमएलएसभन्दा राम्रो छ । मैले साउदी लिगको ढोका खोलेको थिए र अहिले धेरै खेलाडी यहाँ आइरहेका छन्,” रोनाल्डोले भने, “म कुनै युरोपियन क्लबमा फर्कन भन्नेमा शतप्रतिशत विश्वस्त छु ।”

गएको डिसेम्बरमा रोनाल्डो साउदी अरेबियन क्लब अल नासर भित्रिएका हुन् । रोनाल्डोसँगको सम्झौताबारे हालसम्म आधिकारिक तथ्य सार्वजनिक नभए पनि अन्तर्राष्ट्रिय सञ्चारमाध्यमका अनुसार नासरले उनका लागि प्रतिसिजन २०० मिलियन अमेरिकी डलर खर्चिएको छ ।

साउदीमा रोनाल्डोको आगमनपछि पछिल्लो समय अरू केही ठूला नामहरू पनि आउने क्रम जारी छ । साउदी लिगले आउँदो सिजनका लागि करिम बेन्जेमा, मार्सेलो ब्रोजोभिच, ए‘न्गोलो कान्टो र रोबर्टो फिर्मिन्होजस्ता खेलाडीहरू भित्र्याएको छ ।