काठमाडौं । गत मंसिर २७ गते महाभियोग बोकेरै अवकासमा गएका पूर्वप्रधानन्यायाधीश चोलेन्द्रशमशेर जवराले अझै पेन्सनपट्टा पाएका छैनन् । सर्वोच्च प्रशासनले संसद्लाई देखाएर उनको पेन्सनपट्टा बनाइदिएको छैन । 
संघीय संसद् सचिवालयका महासचिव डा. भरतराज गौतमले जवरालाई संसदको आयु सकिएसँगै महाभियोग प्रस्ताव निस्क्रिय भएको पत्र थमाइदिएका थिए । 

त्यही पत्र देखाएर सर्वोच्च फर्कन लागेका जवरा संवैधानिक इजलासको आन्तरिम आदेशबाट महासचिवले दिएको पत्र खारेज भएपछि सर्वोच्चमा प्रवेश पाएनन् । उनी अहिले घरमा बसिरहेका छन् । तर, पेन्सन पट्टा पाउने नपाउने विषयमा उनी अन्योलमा छन् । 

“मैले पेन्सनपट्टा पाउने नपाउने विषय मलाई सोधेर कहाँ हुन्छ, यो कुरा त प्रधानन्यायाधीश वा रजिष्ट्रारलाई सोध्नुपर्छ,” जवराले बाह्रखरीसँग भने, “मैले पट्टा पाएको छैन र पाउने नपाउने जानकारी पनि पाएको छैन ।” 
उनले यसबाहेक आफूसँग केही कुरा नभएको बताए । 

सर्वोच्च स्रोतका अनुसार संसदले प्रक्रिया टुंगिएको नटुंगिएको जानकारी नदिएका कारण उनको पेन्सन पट्टा रोकिएको हो ।  संसदले नै बोलेपछि मात्र पेन्सन पट्टा उनले पाउने वा नपाउने विषय टुंगो लाग्नेछ । 

“संसद्मा उहाँ विरुद्ध महाभियोग छ । महाभियोगमा निर्णय भएको छैन । र, संसदले निर्णय गर्ने वा नगर्ने भनेर जानकारी गराएको पनि छैन,” उच्च स्रोतले भन्यो, “संसद्बाट त्यो कुरा नआउँदासम्म हामीले पट्टा बनाउने सिफारिस गर्ने आधार पाएनौँ ।” 

०७८ साल फागुन १ मा महाभियोग लागेर निलम्बनमा परेका जवरा पदबाट निवृत्त नहुँदासम्म बालुवाटारस्थित प्रधानन्यायाधीश निवासमै बसेका थिए ।  उनी ०७९ साल मंसिर २७ मा उमेरहदका कारण अनिवार्य अवकासमा गएपछि निवास छोडेर निजी निवास सरेका थिए ।