काठमाडौं । नेकपा (एमाले)का अध्यक्ष केपी शर्मा ओलीले पार्टीका उपाध्यक्षहरूसँग छलफल गरेका छन् । ओलीले बुधबार र बिहीबार पार्टीका वरिष्ठसहित सात उपाध्यक्षसँग पार्टी केन्द्रीय कार्यालयमा छलफल गरेका हुन् ।

छलफलमा पार्टी विभागमा आफूहरूले पाएको विभागको क्षेत्रसँग सम्बन्धित विषयमा अध्यक्षलाई जानकारी गराएको उपाध्यक्ष सुवास नेम्वाङले जानकारी दिए । एमालेमा ३२ विभागहरूको क्षेत्रगत रूपमा संयोजन गर्ने जिम्मेवारी उपाध्यक्षहरूलाई दिइएको छ । 

“विभागहरूको क्षेत्रगत आफ्ना आफ्ना जिम्मेवारी छ । आफ्नो क्षेत्रसँगको विषयका बारेमा अध्यक्षलाई जानकारी गरायौँ ,” नेम्वाङले भने । 

यसअघि अध्यक्षले उपाध्यक्षहरूसँग छुट्टै छलफल गर्ने गरेका थिएनन् । पार्टीमा नयाँ सुरुवात भएको र त्यसलाई निरन्तरता दिने विषयमा कुराकानी भएको नेम्वाङको भनाइ छ । 

“अध्यक्ष र उपाध्यक्ष अनौपचारिक रूपमा बस्ने जुन सुरुवात भयो, त्यो राम्रो भयो । अब यसलाई निरन्तरता दिनुपर्छ भन्ने कुरा भएको छ,” उनले बाह्रखरीसँग भने । 

बैठकमा पहिला आफैँभित्रका कमीकमजोरी सच्याउने र पार्टीलाई मजबुत बनाउने कोणबाट छलफल भएको नेताहरूको भनाइ छ । 'मिसन २०८४' मा गम्भीरतापूर्वक लाग्ने एमालेको तयारी छ ।