काठमाडौं । भारतको धार्चुलास्थित धौलीगंगा जलविद्युत् परियोजनाको बाँध खोल्न लागिएको छ । बाँध खोलिँदा महाकाली नदीमा जलस्तर बढ्न सक्ने भन्दै सतर्कता अपनाउन जिल्ला प्रशासन कार्यालय दार्चुलाले आग्रह गरेको छ ।

जिप्रकाका अनुसार भोलि बिहान ५ देखि बेलुका ८ बजेसम्म सिल्ट सफाइको कार्य हुने र त्यसका लागि बाँधको ढोका खोलिने धौलीगंगा पावर स्टेसनले जानकारी गराएको छ ।

भोलि बिहान ५ देखि बेलुका ८ बजेसम्म र त्यसपछि समेत महाकालीमा जल स्तर बढ्नसक्ने सम्भावना रहेको जिप्रका दार्चुलाले जनाएको छ । महाकालीतटीय क्षेत्रका बासिन्दालाई पूर्वसतर्कता अपनाउन जिप्रकाले आग्रह गरेको छ ।

राससका अनुसार धौलीगंगा जलविद्युत् परियोजनाको बाँध बर्सातका बेला हरेक वर्ष खोल्ने गरिन्छ । परियोजनाको बाँध खोल्नुपूर्व सतर्कताका लागि जानकारी गराउने गरिएको छ ।

वि.सं. २०७० असार २ र ३ गते एक्कासि धौलीगंगाको बाँध खोलिँदा दार्चुला सदरमुकामका १०० भन्दा बढी घर बगाउनुका साथै अर्बौँ रुपैयाँको क्षति भएको थियो ।