जनकपुरधाम । मधेस प्रदेशसभामा नेकपा (एमाले) संसदीय दलका नेता सरोजकुमार यादवले मधेस सरकारले आफूहरूको छातीमाथि ढुंगा प्रहार गरेको गुनासो गरेका छन् । आइतबार प्रदेशसभा बैठकमा उनले यस्तो बताएका हुन् ।

“सत्तापक्षले मात्रै चाहेर मधेस प्रदेश बन्दैन, प्रतिपक्षको साथ आवश्यक छ,” उनले भने, “तर, सरकारले यी सबै भावना र साथ–सहयोगलाई तिलाञ्जली दिँदै नेकपा (एमाले)को छातीमा ढुंगा हानेको छ । जुन आक्रमण नेकपा (एमाले)माथि भयो, त्यो हामीलाई सह्य भएन ।”

बजेट वक्तव्यपछि करिब ७० करोड रुपैयाँका योजना रकामान्तर गरिएको भन्दै उनले असन्तुष्टि जनाएका हुन् ।

असार १ गतेपछि सरकारले १५ दिने योजना ल्याएर रकम दुरुपयोग गरेको उनको आरोप छ । “सरकारले कानुनमै रहेर रकमान्तर गरेको भने जवाफ दिन सक्छ, तर १५ दिनमा हुने कामले कस्तो गुणस्तरीयता दिन्छन् ?,” उनले प्रश्न गरे ।

सर्सत अनुदान न्यायोचित ढंगले वितरण नगरिएको र एमालेले जितेको स्थानीय तहमा सर्सत अनुदान नै नपठाएको उनले बताए । “कुनै पालिकामा ५० लाख, कुनैमा दुई करोड र कुनैमा एक रुपैयाँ पनि नदिनु विभेद हो,” उनले भने, “हामीले सदन अवरुद्ध गरेपछि मुख्यमन्त्रीले आश्वासन दिनुभएको थियो । तर पनि सर्सत अनुदान पठाइएन ।”