काठमाडौं । राष्ट्रियसभाका सांसद खिमलाल देवकोटाले मुलुक ऋणको जालोमा फस्दै गएको टिप्पणी गरेका छन् । मंगलबार राष्ट्रियसभा बैठकमा उनले यस्तो बताएका हुन् ।

आर्थिक सर्वेक्षणअनुसार मुलुकले २१ खर्ब ऋण तिर्न बाँकी रहनु त्यसको जालोमा फस्न लागेको संकेत भएको तर्क उनले गरे । कुल जीडीबीको ४२ प्रतिशत मुलुकमा ऋणको भार देखिएको उल्लेख गर्दै उनले त्यो राम्रो संकेत नभएको बताए ।

सरकारले ‘ऋण लिएर घिउ खाएजस्तो’ गरेर बजेट विनियोजन गरेको उनको भनाइ छ ।

“सबैभन्दा धेरै रकम अर्थ मन्त्रालयमा हो । यो आन्तरिक ऋण भुक्तानीमा १०५ प्रतिशतले वृद्धि भएको रहेछ । यो शीर्षकमा अघिल्लोपटक १३४ अर्बको बजेट रहेको थियो । अहिलेचाहिँ २७५ अर्ब । यसमा वैदेशिक ऋण मात्रै जोडने हो भने पनि यो फिगर अझ धेरै माथि जान्छ,” उनले भने, “अब यसले चाहिँ के संकेत गर्‍यो त सम्माननीय सभामुख महोदय ? यसले के संकेत गर्‍यो भने, हामी विस्तारै ऋणको जालोमा, ऋणको पासोमा पस्दै छौँ भन्ने त्यसले संकेत गरिदियो । त्यो बजेटको डाटाले पनि त्यही भन्छ । अब यो आर्थिक सर्वेक्षणअनुसार हामीले तिर्नुपर्ने ऋणचाहिँ २१ खर्ब छ । हाम्रो ऋणचाहिँ कुल जीडीबीको ४२ प्रतिशत हुुँदो रहेछ । योचाहिँ हामीले तिर्नुपर्ने ऋण दायित्व छ । तर, ऋण लिएर घिउ खाएजस्तो अवस्था छ ।”

सांसद देवकोटाले सरकारले ल्याएको बजेट संघीयताविरोधी रहेको पटकपटक दोहोर्‍याए ।