काठमाडौं । प्रधानमन्त्री पुष्पकमल दाहाल प्रचण्ड नेतृत्वको सरकारले ६ महिनाको उपलब्धि सार्वजनिक गरेको छ । प्रधानमन्त्रीसहित मन्त्रिपरिषद्का सदस्यहरूले चालु आर्थिक वर्षमा वृद्धि भएको १५ प्रतिशत तलब नलिने निर्णय गरेको तथा सवारीसाधन खरिद नगर्ने¸ इन्धन¸ मर्मत सम्भार¸ पत्रपत्रिका र फर्निचरलगायतका खर्च घटाउने निर्णय गरेको भन्दै सरकारले यसलाई उपलब्धि मानेको छ ।

प्रधानमन्त्रीको सचिवालयले बिहीबार सार्वजनिक गरेको ६ महिनाको उपलब्धि विवरणमा अनावश्यक भ्रमण रोक लगाउँदा सार्वजनिक खर्चमा मितव्ययीता कायम भएको उल्लेख छ । साथै, सरकारी कार्यसञ्‍चालन खर्चमा उल्लेख्य रूपमा कटौती गर्ने¸ सेवा करार दरबन्दी सिर्जना नगर्ने, अत्यावश्यक बाहेकका तालिम¸ गोष्ठी¸ सेमिनारलगायतका कार्यक्रमहरू स्थगित गर्ने निर्णय भएको भन्दै ६ महिनाको उपलब्धिको रूपमा उल्लेख गरिएको छ ।

सरकारले ६ महिनाको अवधिमा अयोग्य लडाकुलाई कार्यविधि तयार गरी प्रतिलडाकु दुई लाख रुपैयाँका दरले रकम उपलब्ध गराउने निर्णय भएको जानकारी दिएको छ ।

“अनमिनको प्रतिवेदनमा नाम तथा विवरण समावेश भएका र नागरिकताअनुसार प्रमाणीकरण हुने अयोग्य लडाकुलाई कार्यविधि तयार गरी प्रतिलडाकु दुई लाख रुपैयाँका दरले रकम उपलब्ध गराउने निर्णय भएको,” प्रगति विवरणमा लेखिएको छ ।

यस्तै, सरकारले ६ महिनामा विभिन्‍न मितिमा सहिद घोषणा भएर नेपाल राजपत्रमा प्रकाशन हुन बाँकी रहेका आठ हजार ४७१ जना सहिदको नामावली नेपाल राजपत्रमा प्रकाशन गरिएको विषयलाई उपलब्धिको रूपमा उल्लेख गरेको छ ।