काठमाडौं । जनस्वस्थ्य निरीक्षक कौशलेन्द्र मिश्रविरुद्ध विशेष अदालतमा भ्रष्टाचार मुद्दा दायर भएको छ । मिश्रविरुद्ध एक करोड ३० लाखभन्दा बढीको बिगो दाबीसहित अख्तियार दुरुपयोग अनुसन्धान आयोगले मंगलबार अदालतमा मुद्दा दर्ता गरेको हो ।

उनलाई सार्वजनिक पदमा बहाल रहँदा स्रोत नखुलेको सम्पत्ति आर्जन गरेको आरोप छ । मिश्रले सार्वजनिक सेवामा प्रवेश गरेको २० वर्षे अवधिमा जम्मा गरेको करिब एक करोड ३० लाख ४५ हजार ७६० रुपैयाँको स्रोत नखुलेको अख्तियारको दाबी छ ।

मिश्रले सार्वजनिक सेवाको पदमा बहाल रहँदा आफ्नो पदीय हैसियतको दुरुपयोग गरी गैरकानुनी सम्पत्ति आर्जन गर्नुका साथै अमिल्दो र अस्वाभाविक उच्च जीवनस्तर यापन गरेको अख्तियारले आफ्नो विज्ञप्तिमा उल्लेख छ ।

भ्रष्टाचार निवारण ऐन, २०५९ को दफा २० को उपदफा (१) बमोजिमको कसुरमा, ऐनको दफा २० को उपदफा (२) बमोजिमको जरिवाना र कैद हुन माग गरिएको छ । त्यस्तै, गैरकानुनी रूपमा आर्जन गरेको सम्पत्ति निजको नाममा दर्ता रहेको सम्पत्तिबाट जफत गरी पाउन मागदाबी लिइएको छ ।

अख्तियारले मिश्रले गैरकानुनी रुपमा आर्जन गरेको सम्पत्ति र सोबाट बढेबढाएको सम्पत्ति समेत आफ्नी एकासगोलकी पत्नीहरू सरोज कुमारी र तुलसी कुमारी मिश्र शर्माको नाममा राखेको भन्दै उनीहरु समेतलाई प्रतिवादी कायम गर्न माग गरिएको छ ।