काठमाडौं । नेकपा (एमाले)का सांसद रघुजी पन्तले दलितले समान अधिकार कहिले पाउने भन्दै प्रश्न गरेका छन् । आइतबार प्रतिनिधिसभा बैठकमा उनले उच्च जातसँगको विवाहमा दलितले पीडा भोग्नुपरेको बताएका हुन् ।

उनले सप्तरीकी एक २१ वर्षीया युवतीले दलित युवकसँग विवाह गरेको र कपिलवस्तुको अदालतमा दुवैको उमेर २१ वर्ष देखाएर विवाह दर्ता गरिएको घटनाको प्रसंग सुनाए ।

युवतीको बाबुलाई त्यो कुरा मन नपरेकाले युवतीको उमेर वडाध्यक्षमार्फत घटाउन लगाई युवक र उनका दाजुलाई जेल हालिएको सांसद पन्तले बताए । अहिले मुद्दा सर्वोच्च अदालतमा विचाराधीन रहेको भन्दै उनले वडाध्यक्षलाई नक्कली प्रमाण बनाएकामा कारबाहीको माग गरे ।

“दलित केटाले उच्च जातको केटी ल्याउँदा पनि दलित केटाले उच्च जातको केटासँग जाँदा पनि मारमा दलित नै परेको देखिन्छ । खालि प्रशासनको मात्रै दोष होइन, हामी ठूला राजनीतिक दल (कांग्रेस, एमाले, माओवादी) जनताको बीचमा सामाजिक चेतनाको काम गरेनौँ । समाजमा चेतनाको काम गरेनौँ । समाज रूपान्तरणको कुरामा सरकार र प्रशासनमा मात्रै भर पर्‍यौँ,” उनले भने, “समाजमा यस्ता धेरै केस छन् । आज प्रश्न उठेको छ, दलितले समान अधिकार कहिले पाउने ?”