काठमाडौं । सिनेमा हल व्यवसायीहरूको संस्था नेपाल चलचित्र संघले संविधान र कानुनको पालना सबैले गर्नु पर्ने बताएको छ । अधिकार क्षेत्रभन्दा बाहिर गएर काठमाडौं महानगरपालिकाका मेयर बालेन शाहले ‘आदिपुरुष’सहित हिन्दी सिनेमा प्रदर्शनमा रोक लगाएको भन्दै संघले संविधान र कानुनको पालना गर्ने सबैको जिम्मेवारी रहेको बताएको छ । 
 
मेयरको फेसबुक स्टाटसकै भरमा हल बन्द गर्नु परेको भन्दै संघले आपत्ति जनाएको छ । यसबारेमा सञ्चार मन्त्रालय, विकास बोर्ड र स्वयं महानरपालिकाबाट पनि कुनै लिखित पत्र नआए पनि दर्शकको सुरक्षालाई मध्यनगर गर्दै सिनेमा हल बन्द गरेको पनि संघले जनाएको छ । 

“सामाजिक सञ्जाल र सञ्चार माध्यमहरूमा प्रेषित भारतीय चलचित्र आदिपुरुषका सम्बन्धमा संघको गम्भीर ध्यानाकर्षण भएको छ । कामपाका मेयर बालेन्द्र शाहको फेसबुक स्टाटसको आधारमा हामीले मुलुकभर असार १ गते शुक्रबार बिहान शान्ति सुरक्षाका कारण चलचित्र घरहरु बन्द गर्यौं” संघले विज्ञप्ति जारी गर्दै भनेको छ, “पछि कुनै पनि लिखित परिपत्र महानगरपालिका, सञ्चार तथा सूचना प्रविधि मन्त्रालय र चलचित्र विकास बोर्डबाट नआएको हुनाले चलचित्र घरहरूमा सो चलचित्र सार्वजनिक प्रदर्शन गरियो । तर, असार ३ गते आइतबार साँझ फेरि पनि महानगरपालिकाका नगर प्रहरीबाट नै सोमबारदेखि चलचित्र प्रदर्शन नगर्न मौखिक अनुरोध भएकोमा त्यसबाट सृजित भएको अस्पष्टता र अन्योलताले गर्दा सम्बन्धित वितरक कम्पनीले पनि उक्त चलचित्र प्रदर्शन नगर्ने भनी विज्ञप्ति जारी गरेकोले चलचित्र आदिपुरुषको सार्वजनिक प्रदर्शन बन्द गरिएको छ ।” 

सिनेमा हल सञ्चालकहरू मेयर बालेनको उक्त कदमविरुद्ध अदालत पुगेका छन् ।