काठमाडौं । इतिहासकै सबैभन्दा ठूलो दुर्घटनामा परेको पानीजहाज टाइटानिकको भग्नावशेषको खोजी गरिरहेको पनडुब्बी बेपत्ता भएको छ । गएको आइतबार उत्तरी एट्लान्टिकमा बेपत्ता भएको पनडुब्बीको खोजी तथा उद्धारकार्य जारी छ ।

टिटान नामक सो पनडुब्बीले डुबुल्की मारेको एक घण्टा ४५ मिनेटपछि अनुसन्धान गर्ने जहाज पोलार प्रिन्ससँगको सम्पर्क टुटेको थियो । पाँचजना अटाउने उक्त पनडुब्बी चार हजार मिटर गहिराइसम्म जान सक्ने क्षमताको छ ।

पनडुब्बीमा सवार पाँचमध्ये दुई पाकिस्तानी व्यापारी शहजादा दाउद र उनका छोरा सुलेमान रहेको बताइएको छ । त्यहाँ अर्का एक बेलायती व्यापारी एवं अन्वेषक हमिस हार्डिङ रहेको बताइएको छ ।

सोमबार दिउँसो पनडुब्बीको चालक दलका सदस्यसँग बढीमा चार दिनका लागि पुग्ने अक्सिजन बाँकी रहेको आकलन गरिएको छ ।

पनडुब्बी बेपत्ता हुनुअघि हार्डिङले गरेको फेसबुक पोस्टअनुसार फ्रान्सेली अन्वेषक पल हेनरी नार्गोलेट पनि त्यसमा सवार छन् ।

टाइटानिकको भग्नावशेष क्यानडाको न्यु फाउन्डल्यान्डको तटबाट करिब ६०० किलोमिटर टाढा छ ।

टाइटानिक जहाज सन् १९१२ अप्रिल १४ मा दुर्घटनामा परेको थियो । इंग्ल्यान्डको साउथह्याम्प्टनबाट अमेरिकाको न्युयोर्क सहरसम्मको पहिलो यात्रामा टाइटानिक एउटा हिमपहाडमा ठोक्किएको थियो । उक्त दुर्घटनामा जहाजमा सवार दुई हजार २०० मध्ये एक हजार ५०० भन्दा बढी यात्रु समुद्रमा डुबेका थिए । बीबीसीबाट ।