काठमाडौं । राष्ट्रिय स्वतन्त्र पार्टी (रास्वपा)का उपसभापति एवं सांसद डोलप्रसाद अर्यालले भारतीय पक्षले नेपालको कञ्चनपुरस्थित भुजेला, गड्डाचौकी हुँदै सुकासालसम्मको भूमि नापजाँच गरेको भन्दै सत्यतथ्य छानबिन गर्न नेपाल सरकारसँग माग गरेका छन् ।

आइतबार प्रतिनिधिसभा बैठकको शून्य समयमा उनले यही असार १ गते भारतीय प्राविधिकको टोलीले एकतर्फी रूपमा सो जमिनमा नापजाँच गर्दा नेपालका सुरक्षाकर्मीले सुइँको समेत नपाएको भन्दै आपत्ति जनाए ।

उपसभापति अर्यालले नेपालको भूमि भारतीय पक्षले एकतर्फी रूपमा नापजाँच गर्ने काम सामान्य र स्वाभाविक नभएको उल्लेख गरे ।

“म आज भारतीयपक्षले नेपालको भूमि अनधिकृत रूपमा नापजाँच गरेको विषय यो सदनलाई जानकारी गराउन गइरहेको छु । असार १ गते भारतीय प्राविधिकहरूको टोलीले इन्डियन नेसनल हाइवे सर्भे गर्ने भन्दै कञ्चनुपरको भुजेला, गड्डाचौकी हुँदै सुकासालसम्मको भूभाग नापजाँच गरे । सर्भेका सामानसहित आएका ती प्राविधिकहरू नेपाल प्रवेश गर्दा पनि सिमानामा सुरक्षार्थ खटिएका सुरक्षाकर्मीले भने सुइँको समेत पाएनन् । के उनीहरूलाई जागिर खानका लागि मात्र सीमामा खटाइएको हो ? सम्माननीय सभामुखमार्फत म सरकारलाई प्रश्न सोध्न चाहन्छु,” उनले भने, “बरु, सुरक्षाकर्मीभन्दा त्यहाँका स्थानीय धेरै जागरुक र सचेत देखिए सभामुख महोदय । उनीहरूले गलत काम भइरहेको देखेपछि प्रहरीलाई खबर गरेका थिए । नेपालीपक्षसँग समन्वय नै नगरी एकतर्फी रूपमा धमाधम नापजाँच गर्नुलाई सामान्य र स्वाभाविक मान्न सकिँदैन, सभामुख महोदय । त्यसैले त्यसको सत्यतथ्य छानबिनका लागि म सम्माननीय सभामुखमार्फत गृह मन्त्रालयको ध्यानाकर्षण गराउन चाहन्छु ।”

उपसभापति अर्यालले सीमा क्षेत्रमा खटाइएका सुरक्षाकर्मीलाई उचित रूपमा परिचालन गर्न पनि सरकारलाई सचेत गराए ।