काठमाडौं । आफ्नो पतिलाई क्यान्सरपीडित उनकी पहिलो प्रेमिकालाई भेट्न अनुमति दिने एक ताइवानी महिलाको प्रशंसा भइरहेको छ ।

तीन सन्तानकी आमा ती महिलाले यही जुन ७ मा ताइवानी अनलाइन फोरम बाओलियाओ कम्युनमा एक पोस्ट गरेकी थिइन् । उक्त पोस्टमा उनले पूर्वप्रेमीलाई भेट्दा आफ्नो वर्तमान पार्टनरप्रति नकारात्मक दृष्टिकोण राख्नेहरूदेखि छक्क परेको बताएकी छन् ।

यसै सन्दर्भमा उनले आफ्नो तीन वर्षअघिको अनुभव सुनाएकी छन् । उनी र उनका पतिले १४औँ वैवाहिक वर्षगाँठ मनाएका थिए । त्यसपछि उनका पतिले टर्मिनल क्यान्सर भएर मृत्युशय्यामा रहेकी पूर्वप्रेमिकालाई भेट्न जानका लागि सोधेका थिए ।

पूर्वप्रेमिकाकी कान्छी बहिनीले उनलाई फोन गरेकी थिइन् । आफूलाई अन्तिमपटक भेट्ने उनको सबैभन्दा ठूलो इच्छा रहेको ती पुरुषले आफ्नी श्रीमतीलाई बताए ।

श्रीमतीले स्वीकृति नदिएको अवस्थामा भेट्न नजान समेत ती पुरुष तयार थिए । तर, उनीहरू दुवैजना अस्पताल गए ।

ती महिलाले आफ्नो पतिलाई पूर्वप्रेमिकासँग एक्लै बस्न अनुमति दिइन् । आफू अस्पतालको वार्ड बाहिर पर्खिरहिन् ।

त्यसपछि क्यान्सरग्रस्त ती महिलाले उनलाई पनि वार्डमा बोलाइन् र श्रीमान्लाई आफूसँग भेट्न आउन दिएकामा धन्यवाद दिइन् । “उनी बिरामी भए पनि धेरै सुन्दर थिइन्,” उनले भनेकी छन् ।

आफ्ना पतिलाई जुनसुकै बेला ती महिलालाई भेट्न जान दिएको उनले बताएकी छन् । साथी र परिवारको अस्वीकृतिका बाबजुद पनि आफूले त्यसरी जान दिएको उनको भनाइ छ । तर, ६ महिनापछि ती महिलाको मृत्यु भएको उनले उल्लेख गरेकी छन् ।

उनले पूर्वप्रेमी/प्रेमिकालाई भेट्ने विषय गलत नभएको बताएकी छन् । एकार्काबीच विश्वास हुनुपर्नेमा उनले जोड दिएकी छन् । पतिपत्नीबीच विश्वास नै नभए कसरी जीवन सँगै बिताउन सकिन्छ भनेर उनले प्रश्न समेत गरेकी छन् । यो घटनापछि दुवैजनाबीचको सम्बन्ध झनै समझदारीपूर्ण भएको उनको भनाइ छ ।