काठमाडौं । भारतीय चलचित्र ‘आदिपुरुष’का संवाद लेखक मनोज मुन्तशिरले कुनै बेला नेपाल भारतकै हिस्सा रहेको अभिव्यक्ति दिएका छन् ।

भारतीय टेलिभिजन आजतकसँगको कुराकानीका क्रममा उनले सन् १९०४ मा मात्र नेपाल भारतबाट अलग भएको झुटो जिकिर गरेका हुन् ।

“नेपालको विरोध मैले बुझ्न सकेको छैन । जति बेलाको कहानी हो, त्यति बेला नेपाल भारतकै हिस्सा थियो । नेपाल १९०४ मा मात्र भारतबाट अलग भएको हो,” ‘आदिपुरुष’बारे भइरहेको विरोधका विषयमा उनले भने ।

कुनै बेला नेपाल भारतको हिस्सा रहेको र सीता भारतकै छोरी भएको उनको भनाइ छ ।

‘आदिपुरुष’मा ‘सीता भारतकी छोरी’ भन्ने संवाद छ । नेपालमा त्यसको चर्को आलोचना भइरहेको छ । तथ्यलाई बंग्याइएको आलोचकको तर्क छ ।