काठमाडौं । जनता समाजवादी पाटी (जसपा) नेपालले केन्द्रीय समितिको बैठक बोलाएको छ ।

विधान अधिवेशनको तयारी गर्न आगामी असार ९ गतेका लागि बैठक बोलाइएको प्रचारविभाग प्रमुख पूर्ण बस्नेतले जानकारी दिए ।

बैठकमा केन्द्रीय कार्यकारिणी समितिले विभिन्न समिति र संगठनहरूले पठाएको सुझावहरू समेटेर तयार पारेको संशोधित विधानबारे छलफल हुनेछ । केन्द्रीय समिति सदस्यहरूलाई पार्टी कार्यालयमा बिहान १० बजे उपस्थित हुन भनिएको छ ।

जसपाले असार १० देखि १२ गतेसम्म काठमाडौंमा विधान अधिवेशन गर्दै छ । विभिन्न समिति र संगठनबाट गरी ७७८ प्रतिनिधि विधान अधिवेशनमा सहभागी हुँदै छन्, जसमध्ये ४२३ जना केन्द्रीय समिति सदस्यहरू रहेका छन् ।

केन्द्रीय समिति विधान अधिवेशन आयोजक समिति भएकोले जसपाका यी ४२३ केन्द्रीय सदस्यहरु स्वतः विधान अधिवेशनका प्रतिनिधि हुनेछन् ।