काठमाडौं । साफ च्याम्पिनयसिपको तयारीका लागि फिलिपिन्समा अभ्यासरत नेपाली राष्ट्रिय फुटबल टिम अन्तर्राष्ट्रिय मैत्रीपूर्ण खेलमा घरेलु टिमसँग पराजित भएको छ ।

बिहीबार मनिलास्थित रिजाल मेमोरियल रंगशालामा सम्पन्न खेलमा नेपाल फिलिपिन्ससँग १–० ले पराजित भएको हो । नेपाल अब साफ च्याम्पियनसिपका लागि उतैबाट भारत प्रस्थान गर्नेछ ।

जुन २१ देखि जुलाई ४ सम्म सञ्चालन हुने प्रतियोगितामा नेपाल समूह ‘ए’ मा छ । यस समूहमा नेपालसँगै घरेलु टिम भारत, पाकिस्तान र कुवेत छन् । आठ टिमको सहभागिता रहने प्रतियोगिताको समूह ‘बी’मा लेबनान, माल्दिभ्स, भुटान र बंगलादेश छन् ।

नेपालले जुन २१ मा कुवेतविरुद्ध खेल्दै प्रतियोगिताको सुरुआत गर्ने छ । जुन २४ मा नेपालले भारतसँग र जुन २७ मा समूह चरणको अन्तिम खेलमा पाकिस्तानसँग खेल्ने छ । च्याम्पियनसिपमा यसपटक कुवेत र लेबनान आमन्त्रित टिमको रूपमा सहभागी हुने छन् ।