काठमाडौं । साताको अन्तिम कारोबार दिन बिहीबार धितोपत्र दोस्रो बजार मापक नेप्से परिसूचक बढे पनि कारोबार रकममा कमी अएको छ । बुधबार पाँच अर्बभन्दा बढीको सेयर कारोबार भएकोमा आज घटेर तीन अर्ब १६ करोडमा झरेको छ । एक दिनमै सेयर कारोबार रकम एक अर्ब ८५ करोड रुपैयाँले घटेको छ ।

यस दिन होटल तथा पर्यटन समूहका लगानीकर्ताले सर्वाधिक कमाएका छन् । यो समूहको परिसूचक यसदिन ४.५६ प्रतिशतले वृद्धि भएको छ । यो समूहको परिसूचक बढेसँगै यस समूहमा अवद्ध कम्पनीहरुको सेयर मूल्य पनि बढेको छ ।

नेप्से परिसूचक लगातार आठ दिनदेखि उकालो लागेको छ । नेप्से परिसूचक पाँच अंक बढेर २०४२.०७ विन्दुमा रोकिएको हो ।

यसदिन कारोबारमा आएका १३ वटा समूहमध्ये ६ समूहको परिसूचक वृद्धि भएको छ भने बाँकी समूहको परिसूचक घटेको छ । सर्वाधिक परिसूचक घट्नेमा व्यपार समूह रहेको छ । यो समूहको परिसूचक १.७४ अंकले घटेको छ ।

आज म्युचुअल फन्ड, ऋणपत्रलगायत २७० धितोपत्रको ७८ लाख ९६ हजार ४७८ कित्ता खरिद–बिक्री भएको छ ।

सिटी होटलको सेयर मूल्य ९.९७ प्रतिशतले वृद्धि भएको छ । यसदिन भूगोल इनर्जी डेभलपमेन्ट कम्पनीको सेयर मूल्य सर्वाधिक घटेको छ । यो कम्पनीको सेयर मूल्य ५.६८ प्रतिशतले घटेको छ ।

यसदिन शिवम् सिमेन्टको सर्वाधिक मूल्यको सेयर कारोबार भएको छ । यो कम्पनीको १७ करोड ९३ लाख रुपैयाँको सेयर खरिद–बिक्री भएको छ ।