विराटनगर । कोसी प्रदेशसभाको बजेट अधिवेशन अन्त्य भएको छ । सरकारले गरेको सिफारिसको आधारमा प्रदेश प्रमुख पर्शुराम खापुङले प्रदेशसभाको अधिवेशन आज राति १२ बजेदेखि लागु हुनेगरी अन्त्य गरेका हुन् ।

अल्पमतमा रहेको एमाले नेतृत्वको सरकारले नीति तथा कार्यक्रम पास नहुने देखेपछि बुधबार प्रदेश मन्त्रिपरिषदको बैठकबाट चालु अधिवेशन अन्त्य गर्न प्रदेश प्रमुखसमक्ष सिफारिस गरेको थियो । बुधबार नै प्रदेश प्रमुख खापुङले प्रदेश सरकारको आर्थिक वर्ष २०८०/०८१ को नीति तथा कार्यक्रम प्रदेशसभामा पेस गरेका थिए । अब अध्यादेशबाट सरकारले आर्थिक वर्ष २०८०/०८१ को बजेट ल्याउने छ ।

एमाले प्रमुख सचेतक रेवतीरमण भण्डारीले अध्यादेशमार्फत सरकारले बजेट ल्याउने बताए । नेकपा (माओवादी केन्द्र) र जनता समाजवादी पार्टी (जसपा)ले सरकारलाई दिएको समर्थन फिर्ता लिएपछि कोसी प्रदेशमा एमाले नेतृत्वको सरकार अल्पमतमा परेको हो । जेठ २३ गते माओवादीले सरकारलाई दिएको समर्थन फिर्ता लिएको थियो । जसपाले यसअघि नै सरकार छाडेको थियो ।

अल्पमतको सरकारले नीति तथा कार्यक्रम प्रस्तुत गरेपनि पारित हुने अवस्था छैन। सदनबाट पारित नहुने भएपछि अध्यादेशको बाटोबाट सरकारले बजेट ल्याउने तयारी गरेको हो । प्रदेश सरकारले असार १ गते बजेट ल्याउनुपर्ने संवैधानिक व्यवस्था भएअनुसार तयारी गरेको हो । अध्यादेशमार्फत आर्थिक मामिला तथा योजना मन्त्रीको समेत जिम्मेवारीमा रहेका मुख्यमन्त्री हिक्मत कार्कीले बजेट ल्याउने छन्