काठमाडौं । नक्कली भुटानी शरणार्थी प्रकरणमा पूर्वगृहमन्त्री बालकृष्ण खाँणका वकिलहरूको बहस सकिएको छ । खाँणको पक्षमा बहस गर्न ३४ जनाले नाम लेखाएका थिए । तर, १५ जनाले बहस गरेपछि उनकातर्फका वकिलको बहस सकिएको हो ।

खाँणका पक्षमा तीन पूर्वमहान्यायाधिवक्ता, नेपाल बार एसोसिएसनका अध्यक्ष र दुई पूर्वअध्यक्षसहित १५ जनाले बहस गरेका थिए ।

पूर्वमहान्यायाधिवक्ताहरू खम्मबहादुर खाती, रमणकुमार श्रेष्ठ र महादेवप्रसाद यादवले बहस गरे । नेपाल बारका अध्यक्ष गोपालकृष्ण घिमिरेले पनि उनको पक्षमा बहस गरे ।

बारका पूर्वअध्यक्षहरू प्रेमबहादुर खड्का र शेरबहादुर केसी, सर्वोच्च बारका पूर्वअध्यक्ष तथा वरिष्ठत अधिवक्ता हरिहर दाहालले पनि खाँणका तर्फबाट बहस गरे ।

कांग्रेस निकट डेमोक्र्याटिक लयर्स एसोसिएसनका अध्यक्ष योगेन्द्र अधिकारी तथा सुरेन्द्र महतोसहितका वरिष्ठ अधिवक्तासँगै अरू अधिवक्ताले पनि बहस गरेर उनका तर्फको बहस टुंग्याइएको हो । 

बहसमा खाँण पक्षका अधिवक्ताहरूले खाँणलाई जाहेरीमै दोषी नबनाइएकोमा हचुवाको भरमा अभियोग लगाएर जबजर्स्ती फसाउने प्रयास भएको दाबी गरेका छन् । उनीहरूले लेनदेनमा संलग्न नभएको र कुनै पनि जाहेरीकर्ताले नपोलेको व्यक्तिलाई पक्राउ परेकाहरूले पोलेकै भरमा पक्राउ गरिएको तर त्यसरी नै पोलिएका अन्य व्यक्तिलाई बचाउ गरिएको समेत जिकिर गरेका छन् ।