काठमाडौं । फाइनलमा भारतलाई २०९ रनले हराएर आईसीसी विश्व टेस्ट च्याम्पियनसिपको उपाधि जितेसँगै अस्ट्रेलियन क्रिकेट टिम आईसीसीको सबै प्रतियोगिता जित्ने पहिलो टिम बनेको छ ।

आइतबार इंग्ल्यान्डको द ओभलमा दोस्रो इनिङको पाँचौँ दिन भारतलाई २३४ रनमै समेटेपछि अस्ट्रेलियाले २०९ रनको फराकिलो जितसहित टेस्ट च्याम्पियनसिपको उपाधि जितेको हो ।

पहिलो इनिङमा अस्ट्रेलियाले ४६९ रन बनाएको थियो । पहिलो इनिङमा भारतले २९६ रनमात्र बनाएपछि १७३ रनले पछि परेको थियो । दोस्रो इनिङमा अस्ट्रेलियाले आठौँ दिनसम्म २७० रन बनाएपछि भारतले ४४४ रनको लक्ष्य पाएको थियो ।

तर, स्पिनर नाथन लायनले चार विकेट लिएपछि भारत २३४ रनमै समेटिएको थियो । भारतलाई सस्तैमा समेट्न अस्ट्रेलियाका लायनले चार विकेट लिए । स्कट बोलान्डले तीन विकेट लिँदा मिचेल स्टार्क र प्याट कुमिन्सले एक विकेट लिए ।

दोस्रो इनिङमा भारतका विराट कोहलीले ४९ रन बनाए । अजिक्या रहाणेले ४६, कप्तान शर्माले ४३, चेतेश्वर पुजाराले २७ र श्रीकर भरतले २३ रन बनाए । सुभमन गिलले १८ र मोहम्मद सामीले अविजित १३ रन थपे ।

त्यसअघि, पहिलो इनिङमा अस्ट्रेलियाका ट्राभिस हेड र स्टिभ स्मिथले शतक बनाएपछि अस्ट्रेलियाले विशाल योगफल खडा गरेको थियो । हेडले १६३ र स्मिथले १२१ रन बनाएका थिए । यसबाहेक, एलेक्स क्यारीले ४८, डेविड वार्नरले ४३ र मार्नुस लाबुसचेन्जले २६ रन बनाएका थिए ।

पहिलो इनिङमा भारतका अजिक्या रहाणेले ८९, शार्दुल ठाकुरले ५१ र रविन्द्र जडेजाले ४८ रन बनाउनुबाहेक अन्यले खुलेर खेल्न पाएका थिएनन् ।

यो जितसँगै अस्ट्रेलियाले आईसीसीको सबैखाले उपाधि जित्ने कीर्तिमान बनायो ।

अस्ट्रेलियाले हालसम्म आईसीसीका नौ उपाधि जितेको छ । यसक्रममा अस्ट्रेलियाले पाँच एकदिवसीय विश्वकप, दुई च्याम्पियन्स ट्रफी र एक ट्वान्टी–२० विश्वकपको उपाधि जितेको छ ।

अस्ट्रेलियाले कहिले के जित्यो ?

सन् १९८७ : एकदिवसीय विश्वकप
१९९९ : एकदिवसीय विश्वकप
२००३ : एकदिवसीय विश्वकप
२००६ : च्याम्पियन्स ट्रफी
२००७ : एकदिवसीय विश्वकप
२००९ : च्याम्पियन्स ट्रफी
२०१५ : एकदिवसीय विश्वकप
२०२१ : ट्वान्टी–२० विश्वकप
२०२३ : विश्व टेस्ट च्याम्पियनसिप ।