काठमाडौं । अवैध लागुऔषध ब्राउनसुगर (खैरो हेरोइन) १०० ग्रामसहित प्रहरीले आइतबार अपराह्न एकजनालाई पक्राउ गरेको छ । पक्राउ पर्नेमा भारतीय नागरिक २७ वर्षीय हेमन्तकुमार भगत छन् ।

नेपाल प्रहरीको लागुऔषध नियन्त्रण ब्युरोबाट खटिएको टोलीले उनलाई त्रिभुवन अन्तर्राष्ट्रिय विमानस्थलनजिकबाट नियन्त्रणमा लिएको हो । काठमाडौं महानगरपालिका–९, शम्भुमार्ग क्षेत्रबाट भगतलाई पक्राउ गरिएको ब्युरोका प्रवक्ता एवं एसपी चक्रराज जोशीले जानकारी दिए ।

“ती व्यक्ति लागुऔषध लिएर आउँदै छन् भन्ने सूचना हामीलाई पहिल्यै थियो,” उनले बाह्रखरीसित भने, “त्यसैले हाम्रो टोलीले पिछा गरेको थियो ।”

बेच्ने उद्देश्यले नै उक्त ब्राउनसुगर ल्याएको देखिएको उनले बताए ।

पक्राउ परेका भगतले सुनसरीको धरानस्थित भानुचोकमा तरकारी बेच्दै आएका थिए । उनी ब्राउनसुगर लिएर काठमाडौं आउँदै गरेको सूचना पाएपछि ब्युरोको टोली सतर्क भएको थियो ।

उनलाई पक्राउ गर्ने क्रममा प्रहरीले एक राउन्ड गोली प्रहार गर्‍यो । एसपी जोशीका अनुसार ब्युरोको टोलीले चेकजाँच गर्न खोज्दा भगतले प्रहरीमाथि हातपात गरेका थिए ।

पिछा गर्दै प्रहरी शम्भुमार्गमा उनी भएनजिक पुगेको थियो । प्रहरीले समातेर आफ्नो परिचय दिनेबित्तिकै भगतले भाग्ने कोसिस गरेको एसपी जोशीले बताए ।

“हाम्रो सईले आफ्नो परिचय दिनेबित्तिक्कै भाग्न खोज्यो । त्यसपछि उसले सईको अन्डकोषमा समात्यो । संवेदनशील अंगमा समातेपछि सईलाई अप्ठ्यारो भयो र लड्नुभयो, ऊ पनि लड्यो,” उनले भने ।

सोही क्रममा भगतले प्रहरीको पेस्तोल खोस्ने प्रयास समेत गरेको उनले बताए । “त्यसैक्रममा उसले पेस्तोल देख्यो र खोस्न खोज्यो, भाग्न खोज्यो,” उनले भने, “त्यसपछि एक राउन्ड गोली प्रहार गरेर समातेका हौँ ।”

भगतलाई घुँडामुनि गोली हानेर नियन्त्रणमा लिइएको थियो । त्यसलगत्तै उनलाई उपचारका लागि सिनामंगलस्थित काठमाडौं मेडिकल कलेजमा लगियो । त्यहाँबाट मनमोहन अस्पतालमा लगेर थप उपचार भइरहेको उनले जानकारी दिए ।

भगतको स्वास्थ्य अवस्था जटिल नरहेको उनको भनाइ छ । “घुँडामुनि गोली हानिएको हो । मनमोहन अस्पतालमा उपचार भइरहेको छ,” उनले भने ।

भगतको साथबाट बरामद गरिएको १०० ग्राम ब्राउनसुगरको अवैध बजार मूल्य करिब ११ लाख रुपैयाँ हुने उनले बताए । उनी यसअघि पनि यस्तो कार्यमा संलग्न भएको हुन सक्ने आफूहरूको अनुमान रहेको एसपी जोशीले बताए ।

भगतको उपचार र थप अनुसन्धान समानान्तर रूपमा अघि बढाइएको उनले जानकारी दिए ।