काठमाडौं । संघीय संसद्अन्तर्गत प्रतिनिधिसभा बैठक सुरु हुन ढिलाइ भएको छ । आज अपराह्न ४ बजे बस्ने गरी बैठक बोलाइएको थियो । तर, अहिले (पौने ५ बजे)सम्म बैठक सुरु भएको छैन ।

पशुपतिनाथ मन्दिरको जलहरी प्रकरणले शुक्रबारको बैठक अवरुद्ध भएको थियो । सोही बैठक आजका लागि निर्धारण गरिएको हो ।

आज पनि बैठक सुरु हुन सकेको छैन । संघीय संसद् सचिवालयले एकैछिनमा बैठक सुरु हुने र अहिले सभामुख देवराज घिमिरेले दलका नेताहरूसँग छलफल गरिरहेको जनाएको छ ।

“एकैछिनमा बैठक सुरु हुन्छ । सभामुख दलका नेताहरूसँग अहिले पनि सरसल्लाह गरिरहनुभएको छ,” संसद् सचिवालयका प्रवक्ता एकराम गिरीले बाह्रखरीसँग भने ।

आजको बैठकबाट सरकारको नीति तथा कार्यक्रम पारित गर्ने तयारी छ । त्यसअघि, नीति तथा कार्यक्रममाथि सांसदहरूले उठाएका प्रश्नको प्रधानमन्त्री पुष्कपकमल दाहाल 'प्रचण्ड'ले जवाफ दिने सम्भावित कार्यसूची छ ।

प्रमुख प्रतिपक्षी दल नेकपा (एमाले)ले विरोध जनाउँदै अवरोध गरेपछि शुक्रबार बैठक बस्न नसकेको हो । शुक्रबार साढे १२ बजेबाट २० मिनेटका लागि स्थगन गरिएको बैठक दुईपटक समय परिवर्तन गरेर बोलाउँदा पनि बस्न सकेको थिएन । त्यसपछि सभामुखले आज अपराह्न ४ बजेसम्मका लागि बैठक स्थगन गरेका थिए ।

यही जेठ १० गतेको बैठकमा नेकपा (माओवादी केन्द्र)का सांसद लेखनाथ दाहालले जलहरीबारे संसद्मा प्रश्न उठाएका थिए । उनले तत्कालीन एमाले नेतृत्वको सरकारले पशुपतिमा चढाइएको जलहरीमा सुनको सट्टा पित्तल हालेर भ्रष्टाचार गरेको आरोप लगाएपछि एमालेले शुक्रबार संसद् बैठक अवरुद्ध गरेको थियो ।

आज बिहान तीन दलका शीर्ष नेताहरूको बैठकमा उक्त विषयमा सहमति जुटेको बताइएको थियो । त्यसपछि संसद् बैठक नियमित सञ्चालन गर्ने निर्णय गरिएको थियो ।

पशुपतिनाथको जलहरी विवादका विषयमा प्रधानमन्त्री प्रचण्डले संसद्मा सम्बोधन गर्ने शीर्ष नेताहरूबीच सहमति भएको हो । सांसदले दिएको अभिव्यक्ति रेकर्डबाट हटाउने पनि समझदारी भएको एमालेका सचेतक पदम गिरीले जानकारी दिए ।

• दलहरूबीच सहमति जुट्यो, प्रधानमन्त्री प्रचण्डले संसद्मा सम्वोधन गर्ने