काठमाडौं । नेकपा (एकीकृत समाजवादी)का अध्यक्ष माधव कुमार नेपालले प्रधानमन्त्री केपी शर्मा ओलीको समयमा हावादारी कार्यक्रमले प्राथामिकता मात्र पाएको बताएका छन् ।

सोमबारको प्रतिनिधिसभा बैठकमा आर्थिक वर्ष ०८०/०८१ को नेपाल सरकारको वार्षिक नीति तथा कार्यक्रममाथिको छलफलमा बोल्दै उनले घरघरमा ग्यासको पाइप, मिति तोकेर रेलको टिकट काट्ने जस्ता हावादारी कार्यक्रमले प्राथामिकता मात्र पाएको बताए ।

उनले सक्ने भए संसद्मा आफू प्रधानमन्त्री हुँदा के के काम गरेको छ, त्यसको हिसाब सबै प्रधानमन्त्रीले बुझाउन तयार हो भन्दै प्रश्न पनि गरे ।

“राम्रो के हुन्थ्यो भने संसद्मै प्रधानमन्त्रीहरूकै बीचमा पनि आआफ्नो कार्यकालमा क–कसले के के गरे, सब ल्याएर मूल्यांकन यही संसद्ले गर्दिए हुन्छ । म तयार छु, मैले त थोरै पानामा लेखेर पनि ल्याएको छु,” उनले भने, “म पनि प्रधानमन्त्री भइसकेको मान्छे, गरिएका कामहरूको किन चर्चा गरिँदैन भन्ने अरूलाई लागेको होला, पर्यो होला त्यस्तै । तर, नगरेको वा गलत कुराको आलोचनाको पनि सहन सक्नुपर्छ । हाम्रो पालामा तिथिमिति तय गरेर हावादारी कार्यक्रम पनि आए । भनियो यो मितिमा टिकट काट्नुस्, बिजुलीको रेल चढ्नु् । यस्ता हावादारी कुुरा ल्याउन हुँदैन । घरघरमा ग्यास खोइ ग्यास ?”

उनले ल्याउने, सिकाउने, टिकाउने जस्ता कुराहरू लेखेर बजेट र नीति कार्यक्रम ल्याउनुमात्र होइन, त्यसको कार्यान्वयन कति हुन्छ भन्दै प्रश्न पनि उठाए ।