काठमाडौं । नेकपा (एकीकृत समाजवादी)का अध्यक्ष माधवकुमार नेपालले नेकपा (एमाले)का अध्यक्ष केपी शर्मा ओलीमाथि कटाक्ष गरेका छन् ।

सोमबार प्रतिनिधिसभा बैठकमा ओलीप्रति व्यंग्य गर्दै उनले सरकार आफ्नो हातबाट फुस्किएपछि अरूलाई सत्तोसराप गरेर केही नहुने बताए ।

“सहकार्य आवश्यक छ । एकले अर्कालाई घोचेर मात्र हुँदैन । पीडा, व्यथा पोखेर मात्र हुँदैन । सरकारमा बस्न सकिएन, त्यो बेग्लै कुरा हो । किन बस्न सकिएन ? अरूलाई दोष दिएर हुँदैन । बनिसकेको सरकार किन आफ्नो हातबाट फुस्कियो ? अरूलाई सत्तोसराप गरेर हुँदैन,” उनले भने ।

ओलीप्रति व्यंग गर्दै उनले व्यक्तिवादी र सर्वज्ञानी ठान्ने रोग अहिले सबैभन्दा ठूलो समस्या भएको बताए ।

“सबैभन्दा ठूलो समस्या आफूभित्र भएको कमीकमजोरी के छ, त्यसको पहिचान गरेर सुधार गरौँ,” उनले भने, “हामीकहाँ सबैभन्दा ठूलो समस्या व्यक्तिवादको रोग हो । दोस्रो, सर्वज्ञानी ठान्ने प्रवृत्ति र अरूलाई अवमूल्यन गर्ने प्रवृत्ति हो । कुरामा उपदेश बढी छाँट्ने र व्यवहारमा लागु गर्ने चलन कम छ ।”