काठमाडौं । नेपाली कांग्रेसका महामन्त्री एवं सांसद गगन थापाले नेपालमै उत्पादित विद्युतीय सवारीसाधनले भ्याटबिल तिरेको ३५ दिनभित्र दर्ता नगरे जरिवाना लाग्ने प्रावधानलाई लिएर सरकारको ध्यानाकर्षण गराएका छन् ।

प्रतिनिधिसभाको आइतबारको बैठकको शून्य समयमा बोल्दै सांसद थापाले विद्युतीय सवारीसाधन बनाइरहेको यात्रीले दर्ता नपाएपछि प्रधानमन्त्रीको निर्देशनमा कार्यविधि संशोधन भएर दर्ता भए पनि अहिले फेरि समस्या देखिएको बताएका हुन् ।

संसद्मा बोल्दै उनले भने, “अहिले आएर दर्ता प्रक्रियामा फेरि समस्या देखिएको छ । सरकार भन्छ– भ्याटबिल तिरेको ३५ दिनभित्रमा दर्ता भएन भने जरिवाना लाग्छ । पहिले कानुन थिएन, दर्ता भएन । अहिले कानुन बन्यो, दर्ता भयो तर आफै ढिलो कानुन बनाउने निकायले के भन्छ भने दर्ता ढिलो किन गरिस् तैँले ? जरिवाना तिर्नुपर्छ ।”

“सरकारको यो कमजोरीको भारी उद्यमीलाई बोकाउन मिल्छ ?” सांसद थापाले प्रश्न गरे । उनले यो विषय उद्यमीसँग मात्र सम्बन्धित नभएर स्वदेशी उत्पादन नै किन्छु, उपभोग गर्छु भन्ने उपभोक्तासँग पनि सम्बन्धित भएको भन्दा यस विषयमा सरकारको ध्यानाकर्षण गराएका छन् ।