काठमाडौं । नेकपा (एमाले)ले पार्टी केन्द्रीय कमिटी बैठकमा संघीयताबारे छलफल नै नभएको स्पष्ट पारेको छ ।

शनिबार च्यासलस्थित पार्टी कार्यालयमा केन्द्रीय कमिटीको पाँचौँ बैठक समापन गर्दै अध्यक्ष केपी शर्मा ओलीले आफ्नो पार्टीले संघीयताबारे पुनर्विचार गर्ने कुरा सोच्न पनि नसकिने प्रस्ट पारे ।

बैठकमा संघीयताको विरोधमा छलफल गरिएको भन्ने बाहिर भ्रमपूर्ण हल्ला चलाइएको उनले बताए । एमालेले त्यस्ता हल्लालाई सम्पूर्ण रूपमा खारेज गर्ने उनले बताएको पार्टीका प्रचार तथा प्रकाशन विभाग उपप्रमुख विष्णु रिजालले जानकारी दिए ।

• एमालेले भन्यो– लडाकु घोटालासहित सबै काण्ड छानबिन गरियोस्

ओलीले बैठकमा पार्टीको आधिकारिक निर्णय मात्र बाहिर लैजान केन्द्रीय सदस्यलाई निर्देशन समेत दिएका थिए ।

उपप्रमुख रिजालका अनुसार ओलीले बैठकमा आफ्नो पार्टी संविधान निर्माणको नेता पार्टी भएकाले यसका कुनै पनि ‘पिल्लर’लाई हल्लाउने वा चलाउने पक्षमा नरहेको बताएका थिए ।

“हिजोदेखि एउटा हल्ला चलाइएको छ– नेकपा (एमाले)को चालु केन्द्रीय कमिटी बैठकमा संघीयताका बारेमा बहस सुरु भयो । नेकपा (एमाले)ले संघीयतामा पुनर्विचार गर्ने भयो । अब नेकपा (एमाले) संघीयता नमान्ने भयो भन्नेजस्ता जुन खालका गलत हल्लाहरू चलेका छन्, यिनलाई अध्यक्ष कमरेडले सम्पूर्ण रूपमा खारेज गर्नुभएको छ । र, तपाईंहरूलाई थाहा छ,” ओलीको भनाइ उद्धृत गर्दै उनले भने, “हाम्रो पार्टीको बैठक निश्चित एजेन्डाका आधारमा अगाडि बढेको छ । संघीयता अहिले हाम्रो छलफलको विषय पनि छैन । र, संघीयताको बारेमा हाम्रो पार्टीका कुनै छलफल पनि भएको छैन । कुनै साथीहरूले समूहमा उभिँदा राखिएको कुरालाई पार्टीको आधिकारिक निर्णय हो जस्तो गरी जुन ढंगले प्रचार गरिएको छ, यो गलत छ । अध्यक्ष कमरेडले यसको आलोचना गर्नुभएको छ । यो पार्टीको विधिको हिसाबले पनि गलत छ । र, पार्टीको मान्यताको हिसाबले पनि गलत छ । नेपालमा संघीय लोकतान्त्रिक गणतन्त्र निर्माण गर्ने अगुवा पार्टी, नेता पार्टी र यसको सर्जक पार्टी नेकपा (एमाले) हो । यो संविधानको निर्माता नेकपा (एमाले) हो । यो संविधनन निर्माण भएबापत मुलुकले नाकाबन्दी भोग्दा समेत त्यसको दृढतापूर्वक नेतृत्व गर्ने र सामना गर्ने पार्टी हो । यो पार्टीले संविधानलाई हल्लाउने, संविधानको पिल्लरहरूलाई चलाउने अहिले कुनै पनि काम गर्न सक्दैन । र, त्यो काम सोच्न पनि सक्दैन । यो कुरा हाम्रो पार्टीको अध्यक्ष कमरेडले आज बहुत स्पष्ट ढंगले पार्टीको केन्द्रीय कमिटी बैठकमा निर्देशन गर्नुभएको छ । र, सबै केन्द्रीय कमिटीका सदस्यहरूलाई पार्टीको निर्णित कुरा, आधिकारिक कुरा, केन्द्रीय कमिटीका आधिकारिक निर्णयहरू बोकेर जान आग्रह गर्नुभएको छ ।”

‘ग्रासरुट अभियान’बाट प्राप्त सुझावका आधारमा पार्टीको वार्षिक कार्ययोजना पनि तय गरिएको छ । त्यसमा कम्युनिस्ट पार्टीहरूको अन्तर्राष्ट्रिय सम्मेलन गर्ने योजना समावेश गरिएको उनले जानकारी दिए ।