काठमाडौं । इन्डियन प्रिमियर लिग (आईपीएल) मा मुम्बई इन्डियन्सले शीर्ष स्थानको गुजरात टाइटन्सविरुद्ध २७ रनको जित निकालेको छ ।
शुक्रबार वान्खडे क्रिकेट रंगशालामा सम्पन्न खेलमा मुम्बईले प्रस्तुत गरेको २१९ रनको लक्ष्य पछ्याउने क्रममा साविक विजेता गुजरातले निर्धारित २० ओभरमा आठ विकेट गुमाएर १९१ रनमात्र बनाउन सक्यो ।
गुजरातका राशिद खानले ३२ बलमा तीन चौका र १० छक्कासहित अविजित ७९ रन बनाए पनि टिमको हार टार्न सकेनन् । डेविड मिलरले ४१, विजय शंकरले २९ र राहुल तेवातियाले १४ रन जोड्नुबाहेक गुजरातका अन्यले दोहोरो अंकमा रन थप्न सकेनन् ।
मुम्बईका आकाश माद्यवलले तीन विकेट लिए । पीयूष चावला र कुमार कार्तिकेयले समान दुई विकेट लिँदा जासन बेह्रेन्डोर्फले एक विकेट हात पारे ।
त्यसअघि, टस हारेपछि ब्याटिङमा आएको मुम्बईले निर्धारित २० ओभरमा पाँच विकेट गुमाएर २१८ रनको योगफल खडा गरेको थियो ।
सूर्यकुमार यादवले शतक प्रहार गरेपछि मुम्बई विशाल योगफलसम्म पुगेको थियो । सूर्यकुमारले ४९ बलमा ११ चौका र ६ छक्कासहित अविजित १०३ रन जोडे । इशान किसनले ३१, विष्णु विनोदले ३०, कप्तान रोहित शर्माले २९ र नेहल वधेराले १५ रन जोडे ।
गुजरातका राशिद खानले चार विकेट लिए । मोहित शर्माले एक विकेट हात पारे ।
जितसँगै १२ खेलबाट १४ अंक जोडेको मुम्बई तालिकाको तेस्रो स्थानमा उक्लिएको छ । हारका बावजुद १२ खेलबाट १६ अंक जोडेको गुजरात तालिकाको शीर्ष स्थान यथावत छ ।
