काठमाडौं । नेकपा (एमाले)ले उपनिर्वाचनमा मत कम आउनु चिन्ताजनक विषय भएको निष्कर्ष निकालेको छ । 

जारी केन्द्रीय कमिटी बैठकमा अध्यक्ष केपी शर्मा ओलीले प्रस्तुत गरेको राजनीकित प्रतिवेदनमा उपचुनावको परिणामले वर्तमान सत्ताको विकल्प एमाले हो भन्नेमा समेत प्रश्न उठेको उल्लेख छ । आमनिर्वाचनको तुलनामा पार्टीको मत घट्नु गम्भीर विषय भएको ओलीको भनाइ छ । 

यही वैशाख १० गते तीन क्षेत्रमा भएको उपनिर्वाचनमा एमालेले कुनै ठाउँमा जित निकाल्न सकेन । मंसिर ४ गते भएको निर्वाचनमा भन्दा पनि उपनिर्वाचमा एमालेको मत घटेको थियो । 

“नेकपा (एमाले) ले उपनिर्वाचनमा सङ्ख्यात्मक क्षति बेहोर्नु नपरेको भए पनि चितवन–२ र तनहुँ–१ मा पार्टीको मतमा उल्लेखनीय कमी आउनु चिन्ताजनक विषय हो,” प्रतिवेदनमा उल्लेख छ, “गत वर्ष मङ्सिरमा सम्पन्न आमनिर्वाचनको तुलनामा पार्टी मत घट्नु र वर्तमान सत्ताको विकल्प नेकपा (एमाले) हो भन्ने निर्विवाद तथ्यमा समेत प्रश्न उठ्ने खालको परिणाम आउनु गम्भीर विषय हो । सम्बन्धित जिल्ला र प्रदेश कमिटीले यसको गम्भीर समीक्षा गर्नुपर्छ र रहन गएका कमीहरूलाई अविलम्ब सच्याउनुपर्छ ।”