काठमाडौं । नेकपा (एमाल)ले सर्वत्र प्रश्न उठेपछि नक्कली भुटानी शरणार्थी प्रकरणमा मुछिएका पार्टी सचिव टोपबहादुर रायमाझीलाई कारबाही गरेको छ । 

एमालेका महासचिव शंकर पोखरेलले बुधबार विज्ञप्ति जारी गर्दै कारबाही प्रक्रियाको अन्तिम टुंगो नलागेसम्मका लागि निलम्बन गरिएको जानकारी गराएका हुन् । 

नेपाली नागरिकलाई भुटानी शरणार्थी बनाएर अमेरिका पठाउन करोडौँ ठगी गरेको प्रकरणमा हालसम्म १२ जना पक्राउ परिसकेका छन् ।

पूर्वउपप्रधानमन्त्रीसमेत रहेका रायमाझीविरुद्ध वैशाख २० गते पक्राउ पुर्जी जारी भएको थियो । तर, उनी अझै पक्राउ परेका छैनन् । पक्राउ पुर्जी जारी भएपछि उनी सम्पर्कविहीन छन् ।

पार्टीका सचिवमाथि प्रश्न उठेपछि कारबाही नगरेको भन्दै एमाले नेतृत्वको आलोचना भइरहेको छ । तर, एमालेले त्यसको प्रतिवाद गर्दै आएको छ । मंगलबार पार्टीको सचिवालय बसे पनि उनलाई कारबाहीको निर्णय भएन । बैठकले कानुनलाई सघाउन टोपबहादुरलाई आग्रह भने गर्‍यो ।

सोही प्रकरणमा कांग्रेस नेता तथा पूर्वगृहमन्त्री बालकृष्ण खाँण बुधबार पक्राउ परे । उनलाई प्रहरीले निवासबाटै पक्राउमा गरेको हो । 

खाँण पक्राउ परेपछि एमाले दबबामा पर्‍यो । उसले हिजो बसेको सचिवालय बैठकको निर्णयलाई आधार मानेर कारबाही गरेको हो । 

“...केन्द्रीय सचिवालयको उक्त निर्णयलाई समेत ध्यानमा राख्दै राज्यले गर्ने अनुसन्धानमा सहयोग पुगोस् भनेर पार्टीका केन्द्रीय सचिव टोपबहादुर रायमाझीलाई यस सम्बन्धी अनुसन्धान र कानुनी कारबाहीको प्रक्रियाको अन्तिम टुङ्गो नलागेसम्म पदबाट निलम्बन गरिएको जानकारी गराइन्छ,” महासचिव पोखरेलले जारी गरेको विज्ञप्तिमा भनिएको छ । 

एमालेले त्यसअघि टोपबहादुरलाई कारबाही प्रक्रियामा सघाउन संसद्बाटै आग्रह गरेको थियो । 

महासचिवको विज्ञप्ति जारी हुनुअघि आजको प्रतिनिधिसभा बैठकमा उपमहासचिव पृथ्वी सुब्बा गुरुङले अनुसन्धान प्रक्रियामा सहयोग गर्न आग्रह गरे । 

“हाम्रो पार्टीका माननीय टोपबहादुर रायमाझीलाई हामीले हिजो निर्देशन गरेका छौँ । तपाईं यो अनुसन्धान र छानबिनमा सहयोग गर्न लाग्नुस्, सहयोग गर्नुस् भनेका छौँ,” उनले भने ।

साथै, उनले दोषीलाई कारबाही हुनुपर्ने र निदोर्ष फस्न नुहेन बताए । 

“विधिको शासनमाथि विश्वास गर्ने पार्टीको हैसियतले विधिपूर्वक, कानुनपूर्वक जुन खालको अनुसन्धान र छानबिन भइरहेको छ । यसमा सरकार तलमाथि दायाँबायाँ नगरिकन लागोस्,” उनले भने, “दोषीहरू कोही नछुटून्, निर्दोष व्यक्ति कोही पनि नपरून् भन्ने अभियानका साथ लागोस् ।  नेकपा (एमाले) यो सरकारको काममा सहयोग र समर्थन गर्छ ।”