काठमाडौं । स्वतन्त्र सांसद अमरेशकुमार सिंहले सोमबार प्रतिनिधिसभा बैठकमा बोल्न नपाएको भन्दै अर्धनग्न भएर विरोध जनाए ।

सभामुख देवराज घिमिरले आकस्मिक र विशेष समय हटाइएको जानकारी बैठकमा गराएका थिए । त्यसपछि सांसद सिंहले आफूले बोल्न पाउनुपर्ने भन्दै एक/एक गर्दै कम्मरमाथिको कपडा खोलेर विरोध जनाएका थिए ।

• अमरेशले पुनः कपडा नलगाएको भए के हुन्थ्यो कारबाही ? 

संसद्मा सांसदले कपडा नै खोलेर विरोध जनाएको यो नेपालमा पहिलो घटना हो । विश्वमा यसअघि पनि यस्तो घटना भएको थियो ।

सन् २०१३ मा मेक्सिकोका सांसद एन्टोनियो गार्सियाले देशको तेल उद्योगमा विदेशी लगानी खुला गर्ने कानुनसम्बन्धीको छलफलका क्रममा उनले सदनमै आफ्नो लुगा खोलेका थिए । वामपन्थी लोकतान्त्रिक क्रान्ति पार्टीका नेता गार्सियाले उक्त कानुनको विरोधमा संसद्मै लुगा खोलेका थिए ।

गार्सियाले लुगा खोल्दै भनेका थिए, “यसरी नै तपाईंहरूले राष्ट्रलाई नांगो बनाएर लुटाउँदै हुनुहुन्छ ।”

उनले तेल उद्योगमा विदेशी लगानी खुला गर्दा फाइदा नहुने बताएका थिए । “मलाई लाज लाग्दैन, तिमीले जे गर्दै छौ त्यो लज्जास्पद छ,” उनले भनेका थिए ।

त्यहाँ तेल उद्योगमा विदेशी लगानी स्वीकार गर्ने विधेयक पछि संसद्बाट पारित भएको थियो ।

यस्तै, क्यानडाका सांसद विलियम अमोसले कोरोनाका समयमा संसद्को ‘जुम मिटिङ’का क्रममा भिडियो ‘अन’ गरी कपडा खोलेका थिए । उक्त घटना अन्जानवश भएको भन्दै उनले माफी मागेका थिए ।