काठमाडौं । अर्थमन्त्री डा. प्रकाशशरण महतले आगामी बजेटमा हवाई यातायातको सुरक्षा र विमानस्थलको स्तरोन्नतिलाई प्राथमिकतामा राखिने बताएका छन् ।
आइतबारदेखि सुरु भएको बजेट अधिवेशनमा ‘आर्थिक वर्ष २०८०/०८१ को लागि विनियोजन विधेयकका सिद्धान्त र प्राथमिकता’ प्रस्तुत गर्दै उनले हवाई यातायातको सुरक्षा र विमानस्थलको स्तरोन्नतिलाई प्राथमिकतामा राखिने बताएका हुन् ।
उनले कोरोना महामारीपछि पुनरुत्थान हुँदै गरेको पर्यटन क्षेत्रलाई थप गति दिन प्रोत्साहनमूलक कार्यक्रम सञ्चालन गरिने पनि बताए ।
“पर्यटकलाई सुरक्षित पर्यटकीय सेवा सुविधा प्रदान गरिने व्यवस्था मिलाइने छ । महत्त्वपूर्ण धार्मिकस्थल र ऐतिहासिक र सांस्कृतिक स्थलहरूको विकास गरी पर्यटन प्रबर्द्धन गरिनेछ,” उनले भने ।
पर्यटन पूर्वाधारमा लगानी गरिने र नयाँ पर्यटकीय गन्तव्य विस्तार गरी पर्यटन क्षेत्रको विविधीकरण गर्न बजेट विनियोजन गरिने उनको भनाइ छ ।