काठमाडौं । आधा घण्टापछि बस्नेगरी स्थगित भएको प्रतिनिधिसभा बैठक ८ बजे बस्ने भएको छ ।
संसद्का महासचिव भरतराज गौतमले सुचना जारी गर्दै सभामुख देवराज घिमिरेले बैठक ८ बजेका लागि बोलाएको जानकारी दिएका छन् ।
हत्या आरोपमा फरार नेकपा (एमाले) का सांसद लक्ष्मी महतो कोइरीको विषयमा विवाद हुँदा बैठक आधा घण्टा स्थगित गरिएको थियो ।
सभामुख देवराज घिमिरेले कोइरी बिरामी भएर उपचार गराइरहेकाले बिदा स्वीकृतको लागि प्रस्ताव गरेका थिए ।
उनको प्रस्तावमा सत्ता पक्षका सांसदहरूले फरार अभियुक्तलाई बिरामी भएको भनेर बिदा दिन नमिल्ने भन्दै विरोध गरेका थिए ।
महोत्तरी क्षेत्र नम्बर–१ बाट प्रतिनिधिसभा सदस्यमा निर्वाचित कोइरी सशस्त्र प्रहरी थमन विक हत्याका अभियुक्त हुन् ।
उनलाई महोत्तरी जिल्ला अदालतले पुर्पक्षका लागि एक लाख रुपैयाँ धरौटीमा रिहा गरेको थियो ।
पुनरावेदनपछि उच्च अदालत जनकपुरबाट पुर्पक्षका लागि थुनामै राख्न आदेश भएको थियो । सो आदेशपछि उनी फरार छन् ।
