काठमाडौं । नेकपा (एमाले)का सांसद लक्ष्मी महतो कोइरीलाई कारबाही नगरिएको भन्दै सत्तापक्षकै सांसदले संसद्मा उभिएर विरोध जनाएका छन् ।
आजको प्रतिनिधिसभा बैठकमा सत्ता पक्षका सांसदहरूले कोइरी लगातार १० बैठकमा सहभागी नभएको भन्दै कारबाही गर्न माग गरेका थिए ।
सभामुख देवराज घिमिरले प्रक्रियामार्फत अघि बढ्ने भन्दै बस्न आग्रह गरे । “यसको जवाफ मैले अघि नै रुलिङ गरिसकेको छु,” उनले बैठकमा भने ।
सत्ता पक्षका सांसदको होहल्लापछि सभामुखले नेपाली कांग्रेसका सचेतक रमेश लेखकलाई बोल्न समय दिए ।
लेखकले कोइरी उपस्थित नभएकोमा दशौँपटक प्रश्न उठेको बताए । उनलाई प्रहरीले खोजी गरिरहेको र भेटिए पुर्पक्षका लागि थुनामा जानुपर्ने लेखकले बताए ।
बैठकमा सभामुख घिमिरेले कोइरी बिरामी भएको भन्दै बैठकमा उपस्थित हुन नसकेको जानकारी गराएका थिए ।
लेखकले सभामुखबाट बिरामी भएको भनेर प्रस्ताव पेस गर्नु जग हसाइ भएको टिप्पणी गरे । उनले फरार अभियुक्त कोइरी बिरामी भन्ने शब्द रेकर्डबाट हटाउन पनि माग गरे ।
